पोखरा । पोखराका पर्यटनसम्बद्ध विभिन्न १७ वटा संस्थाले पर्यटन बोर्डका कार्यकारी प्रमुखलाई पत्र लेखेर पर्यटन बोर्डको प्रदेश कार्यालय गण्डकीका तीन कर्मचारीलाई कारबाही गर्न माग राखेका छन् ।

उनीहरूले पर्यटन बोर्डको गण्डकी प्रदेश कार्यालय, पोखरामा कार्यरत कार्यालय प्रमुख काशीराज भण्डारीसहित कर्मचारीद्वय नवीन पोखरेल र कुन्दन शर्मालाई तत्काल विभागीय कारबाही गर्न माग गरेका छन् । उनीहरूको सट्टामा नयाँ कर्मचारी पठाउनुपर्ने व्यवसायीको माग छ । 

पर्यटन सम्बद्ध व्यवसायीहरूले पर्यटन बोर्डको प्रदेश कार्यालय निष्क्रिय रहेको विषयमा पत्र लेख्दै विभिन्न आठ बुँदामा हालका कर्मचारीहरूले नियोजित रूपमा राज्यको सुविधा लिएर दायित्व पूरा नगरेको आरोप लगाएका छन् ।

यसअघि पोखरास्थित कार्यालय दुई कर्मचारीको भरमा पनि राम्रोसँग चलिरहँदा अहिले बहालवाला तीन कर्मचारीहरूले कार्यक्रम गर्न भन्ने र कार्यक्रम सकिसकेपछि विभिन्न बहाना देखाएर भुक्तानी नदिएको आरोप उनीहरूले लगाएका छन् ।

पर्यटन व्यवसायीहरूले आफूहरू कार्यक्रमका लागि जाँदा कार्यालयका कर्मचारीहरूले आफूलाई 'डम्पिङ साइटमा पठाएको' भनेर काम नगरेको आरोप लगाएका छन् । उनीहरूले 'कर्मचारीका लागि पोखरा साँच्चिकै डम्पिङ साइट हो ?' भनी प्रश्न पनि गरेका छन् ।

पर्यटन बोर्डका सदस्य, कार्यकारी प्रमुखहरूको बारेमा जभाभाबी बोल्ने, गालिगलौज गर्ने र बोर्डको निर्णय गलत रहेको भन्दै काम गर्न नसकिने भनेर व्यवसायीहरूसँग पनि जथाभाबी बोलेको आरोप उनीहरूको छ ।

पर्यटनमा सक्रिय व्यवसायीहरूको 'सामूहिक आवाज' भन्दै व्यवसायी र सम्बद्ध संस्थाहरूले यस विषयलाई गम्भीरताका साथ लिएर संरचनात्मक सुधार गरिनुपर्ने माग राखेका छन् ।

कोभिडपछि थलिएको पर्यटन बजारलाई उकास्नका लागि बोर्डले भूमिका खेल्नुपर्नेमा बोर्ड आफैँ अहिलेसम्म पनि संक्रमित रहेको उनीहरूको टिप्पणी छ ।