काठमाडौं । अर्थमन्त्री डा. प्रकाशशरण महतले आन्तरिक उत्पादनलाई संरक्षण गर्न उपभोग्य वस्तुमा कर लगाइएको बताएका छन् । 

सोमबार प्रतिनिधिसभा बैठकमा आगामी आर्थिक वर्षको बजेटमाथि उठेका प्रश्नको जवाफ दिँदै अर्थमन्त्री महतले आन्तरिक उत्पादनलाई संरक्षण गर्न कर उपभोग्य वस्तुमा कर लगाएको दाबी गरका हुन् ।

महतले पुँजीगत खर्च बढाउन कार्यतालिकासहित प्रभावकारी कार्यान्वयनको मोडालिटी बनाएको पनि बताए । उनले आफूले बनाएको कार्ययोजना अगाडि बढेमा राजस्व उठाउन कठिन नहुने जिकिर गरे । 

उनले संसदीय क्षेत्र पूर्वाधार विकास कार्यक्रमको विशेषताको कुरै नभएको र गलत प्रचार बढी भएको बताए । पूर्वाधार विकासमा सहयोग पुग्ने गरी ल्याइएको कार्यक्रम पुँजीगत खर्चअन्तर्गत नै भएको बताए ।

कतिपय पहाडी जिल्लामा अझै पनि आधारभूत सडक पूर्वाधार अपर्याप्त रहेकाले आवश्यकताका आधारमा सडक आयोजनामा विनियोजन बढाउनुपरेको महतको भनाइ छ ।