काठमाडौं । युक्रेनका राष्ट्रपति भ्लोदिमिर जेलेन्स्कीले रुसविरुद्धको प्रत्याक्रमण (काउन्टर अफेन्सिभ) सुरु भएको पुष्टि गरेका छन् । प्रत्याक्रमण र रक्षात्मक कार्य भइरहे पनि उनले यसबारेमा थप विवरण खुलाएका थिएनन् ।

युक्रेनी सेनाले पूर्वमा बाख्मुटनजिक र दक्षिणमा जापोरिज्जियानजिकबाट अगाडि बढेर रुसी सेनामाथि लामो दूरीको हमला गरेको छ ।

युक्रेनी आक्रमणका विषयमा रुसी राष्ट्रपति भ्लादिमिर पुटिनले शुक्रबार प्रकाशित एक भिडियो अन्तर्वार्तामा भनेका छन्, “हामी निश्चित रूपमा भन्न सक्छौँ कि युक्रेनी आक्रमण सुरु भएको छ ।”

शनिबार क्यानडाका प्रधानमन्त्री जस्टिन ट्रुडोसँगको वार्तापछि किभमा जेलेन्स्कीले रुसी नेता पुटिनको भनाइ ‘उत्सुकताजनक’ भएको बताए ।

उनले रुसले सधैँ आफू अब धेरै बाँकी नरहेको महसुस गर्ने गरेको टिप्पणी गरेका गरे ।

युक्रेनले लामो समयदेखि पश्चिमी मुलुकहरूले दिएको हतियार र सैन्य तालिमपछि रुसविरुद्ध आक्रमण थाल्ने योजना बनाएको थियो । यो आक्रमण रुसले युक्रेनबाट कब्जा गरेका चार क्षेत्र दोनेट्स्क, खेरसन, लुहान्स्क र जापोरिज्जिया फिर्ता ल्याउनका लागि भएको युक्रेनी भनाइ छ । बीबीसीबाट ।