काठमाडौं । राष्ट्रपतिजस्तो सम्मानित संस्थाका बारेमा अनावश्यक र अनर्गल प्रचार गरिएको भन्दै सत्तासाझेदार दल नेपाली कांग्रेसले आपत्ति जनाएको छ ।

नागरिकता विधेयक प्रमाणीकरण र रेशम चौधरीलगायत कैदीबन्दीलाई आममाफी दिइँदा राष्ट्रपतिमाथि नै आक्षेप लगाउँदै हल्ला मच्चाउनु उपयुक्त नभएको कांग्रेसको ठहर छ ।

शनिबार एक विज्ञप्ति जारी गर्दै संविधानको अपव्याख्याप्रति कांग्रेसको  गम्भीर ध्यानाकर्षण भएको जनाइएको छ ।

नागरिकता विधेयक प्रमाणीकरण गरेर राष्ट्रपति रामचन्द्र पौडेलले संसद् र संविधानको सम्मान तथा संरक्षण गरेको कांग्रेसको सूचना, सञ्चार तथा प्रचार विभाग प्रमुख मीन विश्वकर्माद्वारा जारी विज्ञप्तिमा उल्लेख छ ।

“...सत्तामा हुँदा र सत्ताबाहिर रहँदा फेरिने धारणा, मत र अभिव्यक्तिले दल र दलका नेताहरूकै विश्वसनीयता कमजोर बनाउने कुरामा सबैको ध्यान पुग्नु जरुरी छ,” विज्ञप्तिमा लेखिएको छ, “यस्तो परिस्थिति रहँदारहँदै राष्ट्रपतिजस्तो सम्मानित संस्थाका बारेमा अनावश्यक र अनर्गल प्रचार हुनु खेदजनक छ ।”

विज्ञप्ति पढ्नोस्–