काठमाडौं । सरकारको उद्देश्यअनुरूप सशस्त्र प्रहरी र नेपाल प्रहरीले गोताखोर तयार पारेका छन् । यसपटक १९ सशस्त्र प्रहरी कर्मचारी र एक नेपाल प्रहरी गरी २० गोताखोर तयार गरिएको छ ।
सशस्त्र प्रहरी बल नेपालका केन्द्रीय प्रवक्ता राजेन्द्र खड्काका अनुसार पाँच हप्ताको उक्त तालिम त्रिशूली नदी, कास्कीको पोखरास्थित फेवाताल र सुनसरीस्थित कोसी नदीमा दिइएको थियो ।
यस वर्ष गण्डकी प्रदेश सरकारको सहयोगमा गएको वैशाख १० गतेदेखि सशस्त्र प्रहरीले २० प्रहरी कर्मचारीलाई पाँचहप्ते गोताखोर तालिम दिएको हो । योसँगै सशस्त्र प्रहरी बल नेपालमा हाल ७४ गोताखोर तालिमप्राप्त जनशक्ति तयार भएको खड्काले बताए ।
सशस्त्र प्रहरी बल नेपालले गोताखोर परिचालन गरी हालसम्म २७३ घटनामा ८०२ जनाको जीवितै उद्धार तथा ३१७ शव निकालेको उनले जानकारी दिए ।
यसअघि, सशस्त्र प्रहरी बलले २५ सशस्त्र प्रहरी कर्मचारीलाई यूएनडीपीको सहयोगमा बंगलादेशमा २०६९ वैशाखमा तीनमहिने गोताखोर तालिम दिलाएको थियो ।
गोताखोर तालिमप्राप्त जनशक्तिलाई थप विस्तार गर्दै लैजाने उद्देश्यअनुरूप सशस्त्र प्रहरी बल नेपाल नम्बर १ वराह बाहिनी मुख्यालय सुनसरीमा २०७६ असोज ९ गतेदेखि कात्तिक २५ गतेसम्म १९ सशस्त्र प्रहरी कर्मचारीलाई नेपालमै पहिलोपटक गोताखोर तालिम प्रदान गरिएको थियो ।
यस्तै, सशस्त्र प्रहरीको विपद् व्यवस्थापन तालिम शिक्षालयमा २०७९ वैशाख २५ देखि जेठ २९ गतेसम्म उनीहरूलाई गोताखोर तालिम प्रदान गरिएको थियो । रासस
