काठमाडौं । छनोट चरण पार गरेर आएका थिएगो सिबोथसँग अप्रत्यासित हार बेहोरेपछि वरीयताको दोस्रो स्थानका ड्यानियल मेडभेडेभ फ्रेन्च ओपनको पहिलो चरणबाटै बाहिरिएका छन् ।

रसियाका मेड्भेडेभलाई ब्राजिलका सिबोथले ७–६ (७–५), ६–७ (६–८), २–६, ६–३, ६–४ को स्कोरमा स्तब्ध बनाए । मेड्भेडेभविरुद्ध जित निकालेका सिबोथले पहिलोपटक ग्रान्डस्लामको दोस्रो चरणमा स्थान बनाएका हुन् ।

“म जुनियर खेलाडी हुँदादेखि नै मेड्भेडेभको खेल हेर्थेँ । र, यस्तो मञ्चमा उनलाई हराउनु सपना साकार भएजस्तै छ,” यस वर्ष टुर गेम नखेलेका २३ वर्षीय सिबोथले भने, “मैले खेल जितेपछि कस्तो महसुस गरिरहेको छु भन्ने वर्णन गर्न शब्द थिएन । म निकै खुसी थिए । यो मेरो जिन्दगीकै सबैभन्दा खुसीको दिन हो ।”

सिबोथले अब तेस्रो चरण प्रवेशका लागि अर्जेन्टिनाका गुइडो पेलासँग खेल्नेछन् ।

गत वर्ष चोटका कारण सेमिफाइनल बीचमै छोडेका जर्मनीका एलेक्सेन्डर जेभरेभले पनि वर्षको दोस्रो गान्डस्लाममा विजयी सुरुआत गरेका छन् । गत वर्ष सेमिफाइनलमा जोर्नीको चोटका कारण जेभरेभले राफेल नाडालसँग दोस्रो सेटपछि खेल छोडेका थिए ।

जेभरेभले दक्षिण अफ्रिकाका लोडी ह्यारिसलाई ७–६ (८–६), ७–६ (७–०), ६–१ ले पराजित गरे ।

“पुनः फर्किन पाउनु निकै राम्रो कुरा हो । गत वर्ष कसरी प्रतियोगिताबाट बाहिरिएको थियो भन्ने कुराले पक्कै पनि निराश बनाएको थियो,” जितपछि कोर्टमै भएको अन्तर्वार्तामा जेभरेभले भने ।

वरीयताको २२औँ स्थानमा रहेका जेभरेभले अब तेस्रो चरण प्रवेशका लागि स्लोभाकियाका एलेक्स मोल्कानसँग खेल्नेछन् ।

गत वर्षको उपविजेता कास्पेर रुडले पनि प्रतियोगितामा सुखद सुरुआत गरेका छन् । वरीयताको चौथो स्थानमा रहेका रुडले स्विडेनका एलिएस यमेरलाई ६–४, ६–३, ६–२ ले पराजित गरेका थिए । रुडले दोस्रो चरणमा इटालिका गुइलियो जेपिएरीसँग खेल्नेछन् ।