काठमाडौं । नोभाक जोकोभिचले फ्रेन्च ओपनमा एलेक्सान्ड्रो कोभासेभिचलाई ३–० को सेटमा हराउँदै कीर्तिमानी २३औँ पुरुष ग्रान्डस्लाम सिंगल्स उपाधि जित्ने अभियानको सुरुआत गरेका छन् ।

दुईपटकको च्याम्पियनसमेत रहेका जोकोभिचले कोभासेभिचलाई ६–३, ६–२, ७–६ (७–१) ले हराउँदै दोस्रो चरणमा स्थान पक्का गरे । जोकोभिचसँगै विश्व नम्बर एक कार्लोस अल्कारेजले पनि वर्षको दोस्रो ग्रान्डस्लाममा विजयी सुरुआत गरेका छन् ।

स्पेनका अल्कारेजले इटालीका फ्लाविओ कोबोलीलाई ६–०, ६–२, ७–५ ले पराजित गरे । जोकोभिच र अल्कारेजले ओपनमा जित यात्रा कायम राखे सेमिफाइनलमा प्रतिस्पर्धा गर्नेछन् ।

सर्वियाका जोकोभिचले कोभासेभिचलाई हराएपछि क्यामेरामा ‘कोसोभो सर्वियाको मुटु हो । हिंसा बन्द गर’ लेखेका थिए । सन् २००८ मा सर्वियाबाट स्वतन्त्र भएको कोसोभोमा हाल चर्किएको तनावका कारण जोकोभिचले यस्तो लेखेका हुन् । तर, सर्बियाले कोसोभोको स्वतन्त्रतालाई हालसम्म मान्यता दिएको छैन । कोसोभोमा जातीय आधारमा केही समययता हिंसा बढेको छ ।

सर्वियन पत्रकारहरुसँगको कुराकानीमा जोकोभिचले भने, “म राजनीतिज्ञ हैन । न त मलाई यो बहसमा उत्रिनु नै छ । एक सर्वियनको रुपमा कोसोभोमा के भइरहेको छ भन्ने कुराले दुःख दिन्छ । कोसोभो हाम्रो मुटु हो, गढ हो, सबैभन्दा महत्वपूर्ण घटनाहरूको केन्द्र हो । सबैभन्दा ठूलो युद्ध त्यहाँ भयो, मैले यो लेख्नुको धेरै कारणहरू छन् ।”

कोसोभोको द्वन्दमा जोकोभिचको यो धारणका कारण उनी हाल चर्चाको पात्र बनेका छन् । जोकोभिचले अब प्रतियोगिताको दोस्रो चरणमा हंगेरीका मार्टोन फक्सोभिक्ससँग खेल्नेछन् ।

यता, २० वर्षीय अल्कारेजले भने जापानका टारो ड्यानियलसँग दोस्रो चरणमा प्रतिस्पर्धा गर्नेछन् ।

ओपनमा मंगलबार भएको खेलमा वरीयताको आठौँ स्थानका ज्यानिक सिनरले पनि फ्रान्सका एलेक्सान्डर मुलरलाई ६–१, ६–४, ६–१ ले पराजित गर्दै दोस्रो चरणमा स्थान बनाए । इटालीका सिनरले अब तेस्रो चरण प्रवेशका लागि जर्मनीका ड्यानिलय अल्टमायरसँग खेल्नेछन् ।