काठमाडौं । पर्साको वीरगन्जदेखि ११ दिन पैदल हिँडेर सिर्सिया नदी प्रदूषणमुक्त अभियानको टोली आइतबार काठमाडौं आइपुगेको छ । बारा, पर्सा, धनुषा, सर्लाही र महोत्तरीका २६ जनाको टोली माइतीघर आइपुगेको हो ।

सिर्सिया नदीको मुहान बाराको पथलैयामा छ । सिर्सिया नदी पर्सा हुँदै भारतसम्म पुग्ने गर्छ ।

उद्योग, कलकारखानाको रासायनिक पदार्थ उक्त नदीमा मिसाएर प्रदूषित गरिएको भन्दै त्यसलाई स्वच्छ बनाउनुपर्ने मागसहित उनीहरू काठमाडौं आएका हुन् । माइतीघर आएर उनीहरूले धर्ना सुरु गरेका छन् । अभियन्ताले सिर्सियाको प्रदूषित पानी पनि सँगै लिएर आएका छन् ।

आफूहरूका माग पूरा नभएसम्म आन्दोलन जारी राख्ने अभियन्ता भुलावनकुमार पासवानले बाह्रखरीसित बताए ।

सिर्सिया नदीको पानी केही वर्षअघिसम्म सफा र स्वच्छ थियो । त्यो पानी नुहाउन, कपडा धुन, सिँचाइ गर्न प्रयोग गरिन्थ्यो । तर, अहिले उक्त नदी पूरै प्रदूषित भएको अभियानका राष्ट्रिय संयोजन सुनील यादवले बताए ।

थप तस्बिर हेर्नोस्–