काठमाडौं । उज्वेकिस्तानविरुद्ध ३–० को सोझो सेटमा जित निकाल्दै भारत सेन्ट्रल एसियन भलिबल एसोसिएसन (काभा) महिला भलिबल च्यालेन्ज कप–२०२३ को फाइनलमा प्रवेश गरेको छ ।

शुक्रबार त्रिपुरेश्वरस्थित राष्ट्रिय खेलकुद परिषद् (राखेप) परिसरमा रहेको कभर्डहलमा सम्पन्न खेलमा भारतलाई दोस्रो सेटबाहेक बाँकी दुई सेटमा उज्वेकिस्तानले दबाबमा राख्न सकेन ।

भारतले पहिलो सेट २५–१७ ले जितेको थियो । दोस्रो सेट २५–२० ले आफ्नो पक्षमा पारेको भारतले तेस्रो सेटमा २५–१५ को जित निकाल्दै फाइनल यात्रा तय गर्यो । भारतले अब उपाधिका लागि नेपाल र काजकिस्तानबीचको विजेतासँग खेल्नेछ । नेपाल र काजकिस्तानबीचको खेल आजै अपरान्ह ५ बजेदेखि सुरु हुँदै छ ।

उज्वेकिस्तानले भने दोस्रो सेमिफाइनलमा हार बेहोर्ने टिमसँग तेस्रो स्थानका लागि खेल्नेछ । आठ राष्ट्रले प्रतिस्पर्धा गरिरहेको प्रतियोगिताको समूह ‘ए’मा नेपाल, कीर्गिस्तान, भारत र बंगलादेश थिए । यस्तै, समूह ‘बी’मा उज्वेकिस्तान, श्रीलंका, माल्दिभ्स र काजकिस्तान थिए ।