काठमाडौं । सहकारी ऐन र नियमावली कार्यान्वयन नभएको भन्दै राष्ट्रिय सहकारी महासंघ नेपालले विभिन्न आन्दोलनका कार्यक्रम घोषणा गरेको छ ।

महासंघको सहकारी समस्या समाधान सहजीकरण कार्यदलले सोमबार काठमाडौंमा पत्रकार सम्मेलन गर्दै यही जेठ ९ गतेदेखि माग पूरा नभएसम्म आन्दोलन गर्ने जनाएको हो ।

उक्त दिनदेखि सबै जिल्लास्तरीय संघहरूमा ‘हामी आन्दोलनमा छौँ’ भन्ने कालो ब्यानर राख्ने, सबै सहकारी संघ–संस्थाका कर्मचारीले कालोपट्टी लगाएर दैनिक कार्यसञ्चालन गर्नेलगायत कार्यक्रम गरिने जनाइएको छ ।

राष्ट्रिय सहकारी महासंघका वरिष्ठ उपाध्यक्ष तथा सहकारी समस्या समाधान सहजीकरण कार्यदलका संयोजक ओमदेवी मल्लले सहकारी ऐन र नियमावली कार्यान्वयनका लागि धेरै मन्त्री, उपप्रधानमन्त्री तथा शीर्ष नेताहरूलाई भेट्दा पनि सुनुवाइ नभएको बताइन् । आफूहरूले पहिलोपटक शान्तिपूर्ण रूपमा आन्दोलन गर्न लागेको स्पष्ट उनले स्पष्ट पारिन् ।

सो महासंघका अनुसार नेपालमा ३० हजारभन्दा बढी सहकारी संघ–संस्थामार्फत सात खर्ब रुपैयाँभन्दा बढी पुँजी परिचालन भएको छ । सहकारी क्षेत्रले वित्तीय क्षेत्रमा १७ प्रतिशत योगदान पुर्‍याएको सहकारी महासंघको दाबी छ ।