काठमाडौं । साविक विजेता गुजरात टाइटन्स लिगको शीर्ष स्थानमा रहँदै इन्डियन प्रिमियर लिग (आईपीएल)को प्लेअफमा प्रवेश गरेको छ । आइतबार राति भएको खेलमा रोयल च्यालेन्जर्स बेंग्लोरविरुद्ध ७ विकेटको जित निकाल्दै गुजरात टेबल ‘टपर’ को बनेको हो । गुजरातसँगको हारले बेंग्लोरको यात्रा लिग चरणमै समाप्त भएको छ ।
गुजरातले बेंग्लोरलाई हराउँदा मुम्बई इन्डियन्सले प्लेअफमा स्थान पक्का गरेको छ । योसँगै आईपीएलमा प्लेअफ खेल्ने चारै टिमको टुंगो लागेको छ । गुजरात शीर्ष स्थानमा रहँदा चेन्नाई सुपर किंग्स दोस्रो, लखनउ सुपर जायन्ट्स तेस्रो र मुम्बई चौथो स्थानमा रहँदै प्लेअफमा प्रवेश गरे ।
बेंग्लोरमा भएको खेलमा बेंग्लोरले प्रस्तुत गरेको १९८ रनको लक्ष्य गुजरातले १९.१ ओभरमा चार विकेट गुमाएर भेट्टायो ।
गुजरातको जितमा शुभमन गिलले १०४ रन बनाए । गिलले ५२ बलमा पाँच चौका र आठ छक्का प्रहार गरे । विजय शंकरले ५३ र रिद्दिमान साहले १२ रन थपे ।
बेंग्लोरका मोहम्मद सिराजले दुई विकेट लिए । विजयकुमार व्यास्क र हर्सल पटेलले समान एक विकेट लिए ।
त्यसअघि, विराट कोहलीले शतक प्रहार गरेपछि बेंग्लोरले निर्धारित २० ओभरमा पाँच विकेट गुमाएर १९७ रन बनाएको थियो ।
कोहलीले १०१ रन बनाए । उनले ६१ बलमा १३ चौका र दुई छक्का प्रहार गरे । आईपीएलको इतिहासमा दोस्रोपटक एकै खेलमा दुवै टिमका ब्याटरले शतक प्रहार गरेका हुन् ।
कप्तान फाफ डु प्लेसिसले २८, मिचेल ब्रासवेलले २६, अनुज राउतले २३ र ग्लेन म्याक्सवेलले ११ रन बनाए ।
गुजरातका नुर अहमेदले दुई विकेट लिए । राशिद खान, यश दयाल र मोहम्मद सामीले एक/एक विकेट लिए ।
