काठमाडौं । सेन्ट्रल एसियन भलिबल एसोसिएसन (काभा) महिला च्यालेन्ज कप भलिबल प्रतियोगिताको सम्पूर्ण तयारी पूरा भएको छ । नेपाल भलिबल संघले सोमबार पत्रकार सम्मेलनमार्फत प्रतियोगिताको तयारी पूरा भएको जानकारी दिएको हो ।

यही जेठ ८ देखि १४ गतेसम्म त्रिपुरेश्वरस्थित राखेप कभर्डहलमा हुने प्रतियोगितामा नेपालसहित भारत, श्रीलंका, बंगलादेश, माल्दिभ्स, कजाखस्तान, कीर्गिस्तान र उज्वेकिस्तान गरी आठ राष्ट्र सहभागी हुनेछन् ।

प्रतियोगितामा सहभागी टोलीलाई दुई समूहमा विभाजन गरिएको छ । समूह ‘ए’मा नेपाल, भारत, बंगलादेश र कीर्गिस्तान तथा समूह ‘बी’मा श्रीलंका, माल्दिभ्स, कजाखस्तान र उज्वेकिस्तान छन् ।

प्रतियोगिताको उद्घाटन प्रधानमन्त्री पुष्पकमल दाहाल ‘प्रचण्ड’ र समापन तथा पुरस्कार वितरण युवा तथा खेलकुदमन्त्री डिगबहादुर लिम्बूले गर्नेछन् ।

प्रतियोगिता सञ्चालनका लागि दुई करोड ७१ लाख रुपैयाँ खर्च हुने आयोजकको अनुमान छ ।