काठमाडौं । निखिल उप्रेतीले नेपाली सिनेमा उद्योगमा लामो समय पहिलो रोजाइको नायक भएर काम गरे । एक्सन नायकका रूपमा आफ्नो समयमा दबदबा बनाएका निखिलको समयका लागि समय कुरेर बस्ने थुप्रै निर्देशक र निर्माता थिए । तर, तीनै निखिललाई पनि आफ्नो पारिश्रमिक उठाउन भने हम्मे–हम्मे पथ्र्यो । 

उनले सिनेमा नखेलेको पनि थुप्रै वर्ष भइसक्यो । तर, उनले अझै पारिश्रमिक वापतको रकम उठाइसकेका छैनन् । उनकै शब्दमा पारिश्रमिकवापतको ठूलो रकम उठाउन बाँकी छ । 

“नेपाली सिनेमा उद्योगमा सबैभन्दा गाह्रो नै पैसा उठाउन हो । पैसा उठाउन नेपाली सिनेमा उद्योगमा पैसा नपाएसम्म डबिङ नै नगरिदिने कठोरता देखाउनु पथ्र्यो,” निखिल बाह्रखरीसँग भन्छन्, “डबिङ सकिएपछि पैसा आउँदैनथियो । तर, मैले त्यो नेचर बनाउन सकिनँ । त्यसैले मैले ठूलो रकम उठाउन बाँकी छ ।” 

तर, आफूले अब उक्त रकम माया मारिसकेको निखिल बताउँछन् । “मैले अधिकांशलाई टेन्सन नलेऊ, पूराना कुरा छोड्देऊ भन्दिसकेको छु,” निखिल अगाडि भन्छन्, “धेरैले मेरो २०, ३०, ५० हजार, एक लाख, दुई लाख रुपैयाँसम्म दिन बाँकी राखेका छन् । प्रायः अधिकांश मुभीले कहीँ न कहीँ पैसा दिन बाँकी राखेका छन् ।” आफूसँग पैसा नदिने मुभी र मेकरको फेहरिस्त नै रहेको उनी सुनाउँछन् । 

नेपाली चलचित्र उद्योग पूर्णरुपमा व्यवसायिक नहुँदा थुप्रै समस्या हुने गरेको र त्यसको असर सिनेमा मेकिङमा पर्ने गरेको उनको निष्कर्ष छ ।