काठमाडौं । भैरहवास्थित गौतमबुद्ध अन्तर्राष्ट्रिय विमानस्थलबाट सोमबार बिहान श्री एयरलाइन्सको उडान नम्बर एसएचए ८२२ जहाजले ‘टेक अफ’ लियो । जहाजमा चालकदलका सदस्यसहित ८१ जना सवार थिए ।

उक्त जहाजले विमानस्थलबाट ९ः४० मा टेक अफ लिएको थियो । त्यससँगै जहाजको ‘ल्यान्डिङ गियर’मा समस्या आयो । नेपाल नागरिक उड्डयन प्राधिकरणका प्रवक्ता जगन्नाथ निरौलाका अनुसार जहाज टेक अफको केही समयपछि नै ल्यान्डिङ गियर भित्र राख्नुपर्ने हुन्छ ।

ल्यान्डिङ गियरमा समस्या आएको पाइलटले विमानस्थल कार्यालयलाई जानकारी गराए । पाइलटले जहाज सोही विमानस्थलमै ‘ल्यान्ड’ गर्ने निर्णय गरे । विमानस्थलले पनि त्यसका लागि अनुमति दियो । त्यसपछि आकस्मिक रूपमा जहाजलाई ९ः५८ मा भैरहवा विमास्थलमा अवतरण गराइयो ।

जहाज सुरक्षित रूपमा अवतरण गराइएको थियो । त्यसपछि रनवेमा करिब २० मिनेट रोकियो । सोही कारण सोमबार गौतमबुद्ध विमानस्थलमा ५० मिनेट उडान र अवतरण प्रभावित भएको थियो ।

श्रीको जहाज त्यहाँ रोकिँदा काठमाडौंबाट भैरहवाका लागि उडेको यती एयरको विमान काठमाडौं नै ‘डाइभर्ट’ गरिएको थियो ।

जहाजले ल्यान्ड गरेपछि यात्रीलाई सुरक्षित रूपमा बाहिर निकालेर यात्रुकक्षमा लगिएको विमानस्थलका प्रवक्ता विनोद सिंह रावलले जानकारी दिए ।

जहाजमा के कारण समस्या आयो भन्ने विषयमा प्राविधिक टोलीले छानबिन गर्ने उनले बताए ।