काठमाडौं । साताको अन्तिम दिन बिहीबार (आज) कुल बजार पुँजीकरण २७ खर्ब ७२ अर्ब तीन करोड रुपैयाँ रहेको छ । गत साताको अन्तिम कारोबार दिन यस्तो कुल बजार पुँजीकरण २७ खर्ब ९३ अर्ब ४१ करोड रुपैयाँ रहेको थियो ।

एक सातामै कुल बजार पुँजीकरण भने २१ अर्ब ३८ करोड रुपैयाँले घटेको छ । नेप्सेको कुल बजार पुँजीकरणलाई लगानीकर्ताको सम्पत्तिका रूपमा पनि हेरिन्छ । त्यसले पनि समग्रमा हेर्दा सेयर बजारमा लगानीकर्ताले एक सातामै २१ अर्ब ३८ करोड रुपैयाँ गुमाएका छन् ।

साताको अन्तिम कारोबार आज परिसूचक १८.१५ अंक घटेसँगै परिसूचक १९१५.१४ विन्दुमा रोकिएको छ । नेपाल स्टक एक्सचेन्ज (नेप्से) का अनुसार बुधबारको तुलनामा बजार १८.१५ अंकले घटेको हो भने गत साताको अन्तिम दिनको तुलनमा पनि यो सता समग्र बजार १८ अंकले नै घटेको छ ।

गत साताको अन्तिम कारोबार दिन बिहीबार नेप्से परिससूचक १९३३ विन्दुमा थियो । उक्त विन्दु बराबरमा बजार हिजो (बुधबार) आएको थियो ।

यो साता चार दिन मात्र सेयर कारोबार भएको छ । जसमा एक कारोबार दिन चैत ६ गते नेप्से साढे २२ अंकले वृद्धि भएको थियो । तर, त्यसयता परिसूचक दैनिक घटेको छ । बुधबार र बिहीबार मात्र बजार ३४ अंक घटेको नेप्सेले जनाएको छ ।

परिसूचक घट्दो क्रममा देखिएको छ भने कारोबार रकममा भने वृद्धि भएको देखिएको छ । पछिल्ला दिनहरूमा सेयर कारोबार रकम बढ्दै गएको देखिन्छ । पछिल्ला तीन कारोबार दिनमा कारोबार रकम ३४ करोड ३३ लाख रुपैयाँले वृद्धि भएको छ ।

नेप्सेका अनुसार चैत ५ गते एक अर्ब ६ करोड रुपैयाँको सेयर कारोबार भएको थियो भने चैत ६ गते एक अर्ब २९ करोड रुपैयाँको, चैत ८ गते एक अबै ३३ करोड रुपैयाँको र चैत ९ गते (आज) एक अर्ब ४१ करोड रुपैयाँको सेयर कारोबार भएको छ ।

नेप्से घट्दा कारोबारीहरू बढ्दै गएकाले पनि कारोबार रकममा वृद्धि भएको देखिन्छ ।