काठमाडौं । नेपाल–अमेरिका दौत्य सम्बन्धको ७५ वर्ष पुगेको अवसरमा नेपाल फेस्टिभल–२०२३ गर्न लागिएको छ ।
सन् १९४७ अप्रिल २५ तारिखमा काठमाडौंमा नेपाल र अमेरिकाबीच दौत्य सम्बन्ध स्थापना भएको थियो ।
दौत्य सम्बन्धको ७५ वर्ष पूरा भएको अवसरमा अमेरिकाको कनेटिकट राज्यको ब्र्यानफोर्डमा ‘सोसाइटी अफ नेप्लिज इन अमेरिका’ले फेस्टिभल गर्न लागेको हो ।
नेपाली कला–संस्कृति, खानपान, भेषभूषा र मौलिकताको प्रवर्धन गर्ने उद्देश्य राखेर कनेटिकट राज्यमा पहिलोपटक नेपाल फेस्टिभल हुन लागेको हो । ब्र्यानफोर्डको ग्रिन पार्कमा जुलाई १५ मा हुने नेपाल फेस्टिभलमा नेपालीे भेषभूषा, संस्कृति झल्काउने पहिरन र खानाका स्टलहरु राखिने तथा नेपाली गीत संगीतमार्फत मनोरञ्जन गराइने आयोजक समितिको संयोजन गरिरहेका सुवास अर्यालले जानकारी दिए ।
नेपाल फेस्टिभलमा कनेटिकट तथा वरपरका राज्यहरूका उच्चपदस्थ अधिकारीलाई पनि सहभागी गराउने पहल भइरहेको आयोजक समितिले जनाएको छ ।
