काठमाडौं । चलचित्र विकास बोर्डले दुबईमा हुने नेपाल सिनेमा फेस्टका लागि सूर्य कर्पाेरेसनलाई व्यवस्थापकीय जिम्मेवारी मात्रै दिइएको बताएको छ ।
बिहीबार एक विज्ञप्तिानर्फत बोर्डले सूर्य कर्पोरेसनसँग सहकार्य गरेको नभई उसलाई व्यवस्थापकीय जिम्मेवारी मात्र दिएको स्पष्टीकरण दिएको हो । यसका लागि बोर्ड र कर्पोरेसनबीच एमओयू सम्झौतामा हस्ताक्षरसमेत भइसकेको जनाइएको छ ।
‘नेपाली सिनेमा र पर्यटनलाई विश्वमाझ लैजाने’ नारासहित चलचित्र विकास बोर्डको आयोजनामा दुबईमा हुन लागेको अन्तर्राष्ट्रिय चलचित्र महोत्सवमा चलचित्र ‘ऐना झ्यालको पुतली’ र ‘कबड्डी ४’ प्रदर्शन गरिनेछ ।
यसवर्ष नेपालबाट ओस्कार अवार्डमा सिफारिस भएको र बुसान फेस्टिभलमा आधिकारिक छनोट भएकाले चलचित्र ‘ऐना झ्यालको पुतली’लाई प्रदर्शन गर्न लागिएको बोर्डले जनाएको छ । त्यस्तै, नेपाली चलचित्रको बक्स अफिस इतिहासमा सर्वाधिक ग्रस कलेक्सन गरेको फिल्म भएको कारण ‘कबड्डी ४’ प्रदर्शन गर्न लागिएको हो ।
चलचित्रलाई यूएईस्थित कूटनीतिज्ञ, व्यवसायी, नेपाली समुदाय तथा फिल्ममेकरले हेरेर छलफल चलाउनेछन् ।
महोत्सवको प्रमुख उद्देश्य नेपाली फिल्मको अन्तर्राष्ट्रियकरण र विदेशी बजार विस्तार गर्नु रहेको बोर्डले जनाएको छ जसका लागि ३० लाख रुपैयाँ बजेट विनियोजन भइसकेको छ ।
आयोजनामा हुने फेस्ट यही माघ २९ गतेदेखि फागुन ३ सम्म चल्नेछ ।
