काठमाडौं । नेपाल स्रष्टा समाजले दुई सम्मानको घोषणा गरेको छ । २०७९ सालको ‘सुभद्रा विश्वराज स्रष्टा सम्मान’ कवि श्रीहरि फुयाँललाई र ‘रमेशगङ्गा स्रष्टा सम्मान’ हास्यव्यंग्यकार नरनाथ लुइँटेललाई प्रदान गरिने समाजले जनाएको छ ।

दुवै सम्मानका साथ नगद राशि २१ हजार १११ रुपैयाँ प्रदान गरिनेछ । समाजको हालैको बैठकले सो निर्णय गरेको हो ।

कवि तथा समाजका पूर्वअध्यक्ष विधान आचार्यले आफ्ना मातापिताका नाममा स्थापना गरेको ‘सुभद्रा विश्वराज स्रष्टा सम्मान’बाट यसअघि कवि रमेशचन्द्र देवकोटा, नारायणदत्त शास्त्री, घनश्याम कँडेल, रमेश खकुरेल र भुवनहरि सिग्देल सम्मानित भइसकेका छन् ।

वाग्मती प्रदेशका सांसद तथा राष्ट्रिय योजना आयोगका पूर्वउपाध्यक्ष डा. दिनेशचन्द्र देवकोटालगायत व्यक्तिले स्थापना गरेको ‘रमेशगङ्गा स्रष्टा सम्मान’बाट यसअघि साहित्यकारहरू जनार्दनशरण त्रिपाठी र प्रा. डा. वासुदेव त्रिपाठी सम्मानित भइसकेको समाजले जनाएको छ ।