सामाजिक अभियानबाट उदाएका नेता हुन् मिलन पाण्डे । सिभिल ईञ्जिनियर पाण्डे प्राध्यापन क्षेत्रमा सक्रिय छन् । 
उनी ०७४ को निर्वाचनमा प्रतिनिधिसभाका लागि विवेकशील साझा पार्टीका तर्फबाट उमेदवार बने र ४ हजार ९४६ मतसहित तेस्रो बने ।

त्यसबेला उनको पार्टी वैकल्पिक राजनीतिको नारामा जनताको घरदैलोमा गएको थियो । 

तर, पाँचवर्ष पछि अवस्था फरक बनेको छ । उनी अहिले उक्त पार्टीमा छैनन् । उनी यहाँ स्वतन्त्र उमेदवार हुन् ।
पाइला चुनाव चिह्नमा उनी चुनाव लड्दैछन् । 

पाण्डेलाई बाह्रखरीले २५ जना जित्नुपर्ने उमेदवारको सूचीमा पनि राखेको छ ।

उनै पाण्डेसँग बाह्रखरीका रोमन आचार्य र जनक वलीले गरेको निर्वाचनकेन्द्रित संवादको सम्पादित अंश :

बाह्रखरीले तपाईंलाई २५ उमेदवारभित्र अनुमोदन गरेका छ , अनुमोदनबारे तपाइँको के विचार छ ?

बाह्रखरी विश्वसनीय मिडिया हो । राम्रा मिडिया र मानिसहरुले नै उमेदवारहरुलाई अनुमोदन गरेर मतदातालाई बाटो देखाइदिने यो कार्य निकै राम्रो लागेको छ । 

जसरी जनआन्दोलनमा मिडियाले मुख्य भूमिका खेलेको थियो, निर्वाचन पनि जनआन्दोलन भन्दा कम होइन त्यसैले मिडियाको यस्तो किसिमको सक्रियता निकै जरुरी छ । म धेरै खुसी र आभारी पनि छु । बाह्रखरीले मलाई क्रेडिवल उमेदवार सोचेर अनुमोदन गरेको हुँदा अझै केही साथीहरुलाई त्यस लिष्टमा राखेको भए लाग्नु स्वाभाविक हो ।

मतदाताको प्रतिक्रिया कस्तो छ ?
एकदम राम्रो रहेको छ । हामी घरदैलो कार्यक्रममा जान अगाडि फेसबुकमा जानकारी दिएका थियौँ र उँहाहरू सबै यहीँको स्थानीय हुनुहुन्छ । हामी अझै पनि आफ्नो मतदान चिह्न सँगसँगै आफ्नो योजना तथा एजेन्डालाई घर–घर चिर परिचित गराउँदै छौँ । 

हामीलाई बाह्रखरीले अनुमोदन गरेपछि सहज पनि भएको अनुभूति भएको छ । बुद्धिजीवीहरुले पनि साथ दिइरहनुभएको छ ।

मतदाताहरु वर्तमान राजनीतिबाट आजित हुनुहुन्छ ।

उहाँहरु नयाँ अनुहारलाई खोजीरहनु भएको छ । म यसअघि पनि यही घरदैलोमा भोट माग्न आएको हुँ, म एउटा युवा हुँ, स्थानीय पनि हुँ । लामो समयदेखि राजनीतिमा संघर्ष गरिरहेको छु । त्यस कारण यस क्षेत्रका मतदाताहरुको आशाको रुपमा देखिएको पनि छु । 

मतदाता सचेत भइसकेका छन् उमेदवार छान्नको लागि तर पनि अन्तिम समयमा चलखेल भएर जे पनि हुन सक्छ। 
यहि पनि मतमा बार्गेनिङ भइरहेको देखेको छु। ।

आफ्नो प्रतिष्पर्धी कसलाई ठान्नु भएको छ ? गठबन्धनको माझमा तपाईँले आफ्नो स्थान राख्न सक्नु हुन्छ त ?

यहाँका मतदाताले कृष्णगोपाल श्रेष्ठ र मलाई नै प्रतिष्पर्धी मान्नु भएको छ । त्यसमा जनबोलीको आवाजमा मिलन पाण्डे रहेको छ । 

मेरो आस्था र विचारहरुको माझमा काङ्ग्रेस र माओवादीको भन्दा मेरो विचारलाई मतदाताले स्वीकार गरेका छन् ।

म गठबन्धनको उमेदवारको भन्दा मेरो योग्यता र क्षमता बढी भएका कारण ती पार्टीनजिक रहेका मतदाताको मत पनि मलाई आउँछ भन्नेमा विश्वस्त छु ।

नयाँ अनुहार, भिजनका लागि पनि मिलन पाण्डेले जित्नैपर्छ ।

वैकल्पिक राजनीतिको लागि पार्टी निर्माण गर्नुभयो त्यही पार्टी छोड्नु भयो, यसमा तपाईँलाई कस्ता प्रश्न आइरहेका छन् ? 

म अझै पनि वैकल्पिक राजनीति गरिरहेको छ । अझै पनि उज्ज्वल थापासँग मिलेर ल्याएको विवेकशील अभियान छाडेको चाहिँ छैन । त्यसलाई नै अघि बढाउछौँ ।

पार्टी बनाउँदा जग बलियो नभएर हो कि टुक्रिन गयो तर चुनावपछि सबैलाई एकढिक्का बनाउनेछौँ ।

मतदाताले तपाईँलाई किन भोट दिने ? 

म योजना र भिजनका साथ आएको छु । युवा भएको कारणबाट मात्र भोट मागिरहेको छैन । स्पष्टताका साथ आएको छु । मेरा मुख्य एजेन्डा भनेको शिक्षा, स्वस्थ्य र रोजगारी हुन् । सांसदले नीतिगत तहबाट यी एजेन्डाहरु पूरा गर्ने प्रतिवद्दता लिएर आएको छु । 

शिक्षा स्वास्थका कुराहरु संसद् भवनमा पुगेर ठुला भनिएका नेताहरुसँग प्रश्न गर्नुपर्छ । रोजगारीको समस्या त्यस्तै छ । 

युवामा एउटा आशा जगाउन जरुरी छ । अहिलेसम्म माइतीघरबाट गरेका मुद्दाको समाधन अब नीतिगत तहमा पुगेर गर्ने छु । त्यसैले पनि यस क्षेत्रका मतदाताले मलाई जिताउन आवश्यक छ ।