सुर्खेत । आउँदो मंसिर ४ गते हुने प्रतिनिधि र प्रदेशसभा सदस्य निर्वाचन आउन दुई साता बाँकी छ । निर्वाचन नजिकिँदै गर्दा राजनीतिक दलहरूले गाउँकेन्द्रित अभियानलाई तीव्र बनाएका छन् ।

दुई प्रतिनिधिसभा र चार प्रदेशसभा निर्वाचन क्षेत्र रहेको दैलेखमा मुख्य गरी नेकपा (एमाले) र सत्ता गठबन्धनका दल नेपाली कांग्रेस, नेकपा (माओवादी केन्द्र) र नेकपा (एकीकृत समाजवादी) गाउँकेन्द्रित चुनावी अभियानमा जुटेका हुन् ।

वि.सं. २०७४ मा सम्पन्न निर्वाचनमा तीन प्रदेशसभामा एमाले र एक प्रदेश निर्वाचन क्षेत्रमा माओवादीले जित हासिल गरेको थियो । प्रदेशसभाको उक्त निर्वाचनमा एमाले र माओवादी केन्द्रको चुनावी गठबन्धन रहेको थियो । जिल्लाका दुवै निर्वाचन क्षेत्रमा विजयी भएको एमालेलाई यसपटक पाँचदलीय गठबन्धन चुनौती बन्ने देखिएको छ ।

एमालेलाई यो चुनौती प्रतिनिधिसभा र प्रदेशसभा दुवै क्षेत्रमा पर्ने देखिन्छ । क्षेत्र नम्बर–१ मा पर्ने ६ वटा स्थानीय तहमध्ये तीन स्थानीय तहमा एमाले विजयी भएको छ । अरू दुई स्थानीय तहमा माओवादी केन्द्र र एक स्थानीय तहमा कांग्रेस विजयी भएको छ । स्थानीय तहको मत नतिजालाई केलाउने हो भने यहाँ गठबन्धनभन्दा एमाले करिब नौ हजार ३९८ मतले पछि देखिन्छ ।

दैलेख–१ मा प्रतिनिधिसभा सदस्यका लागि एमालेबाट रवीन्द्रराज शर्मा र गठबन्धनबाट एकीकृत समाजवादीका अम्मरबहादुर थापाको उमेदवारी छ । पाँच दलका साझा उमेदवार रहेकाले आफूले जित्ने समाजवादीका उमेदवार थापाले जिकिर गर्दै आएका छन् । उसो त एमालेका उम्मेदवार शर्माले एमालेको जनाधार बलियो रहेकाले योपटक पनि आफू निर्वाचित हुने दाबी गरेका छन् ।

तीन दशक एउटै पार्टीमा रहेर सहकर्मीका रूपमा काम गरेका गठबन्धनका साझा उमेदवार थापा र एमालेका शर्माबीचको चुनावी प्रतिस्पर्धा निकै रोचक हुने देखिन्छ ।

नारायण नगरपालिकामा एमालेभन्दा पाँचदलीय गठबन्धन पछि रहेको छ । स्थानीय तहको मतपरिणामलाई हेर्दा यहाँ एमालेले पाँच हजार ४३६ मत प्राप्त गर्दा गठबन्धन दलहरूले पाँच हजार ३८२ मत प्राप्त गरेका छन् । नौमूले गाउँपालिकामा एमालेभन्दा गठबन्धनका दल झन्डै चार हजार मतले अघि छन् ।

नौमूलेमा सामाजवादी–माओवादी गठबन्धनमा तीन हजार २०० मत र कांग्रेसको दुई हजार ५४४ मत रहेको छ भने एमालेको एक हजार ९२० मत रहेको छ । भगवतीमाई गाउँपालिकामा गठबन्धनका दलहरूको मत पाँच हजार ७६ देखिन्छ । एमालेले स्थानीय तहको निर्वाचनमा भगवतीमाई गाउँपालिकामा एक हजार ९३३ मत प्राप्त गरेको छ ।

गुराँस गाउँपालिकामा गठबन्धनका दलले चार हजार ५०८ मत पाएका छन् भने एमालेको चार हजार ६८१ मत पाएको छ । डुङ्गेश्वर गाउँपालिकामा एमालेले तीन हजार ४०६ मत पाएको छ भने गठबन्धन दलहरूको तीन हजार ३३६ मत पाएका छन् । ती स्थानीय तह क्षेत्र नम्बर–१ को ‘क’ प्रदेशमा पर्छन् । यो प्रदेशमा गठबन्धन दलका पूर्णबहादुर चालिसे र एमालेका धर्मराज रेग्मीले उमेदवारी दिएका छन् । यसमा गठबन्धनका चालिसे बलियो देखिएका छन् ।

स्थानीय तह निर्वाचनमा महावु गाउँपालिकामा कांग्रेसले दुई हजार ९७९, एकीकृत समाजवादीले दुई हजार २६८ र एमालेले दुई हजार ५१९ मत प्राप्त गरेको छ । क्षेत्र नम्बर–१ को ‘ख’ प्रदेशमा ती स्थानीय तह पर्छन् । यो प्रदेशसभाका लागि एमालेबाट प्रेमबहादुर थापा र गठबन्धनबाट कृष्णकुमार बिसीले उमेदवारी दिएका छन् ।

दैलेख क्षेत्र नम्बर–२ मा पाँच स्थानीय तह पर्छन् । चार स्थानीय तहमा कांग्रेसले जितेको छ भने आठबीस नगरपालिकामा मात्र एमालेले जित हासिल गरेको छ । वि.सं. २०६४ बाट संघीय निर्वाचनमा पराजित नभएको एमालेलाई अहिले पाँचदलीय गठबन्धन भारी पर्नेे देखिन्छ ।

स्थानीय निर्वाचनमा दलहरूले पाएका मत केदाउँदा एमाले गठबन्धनका दलभन्दा तीन हजार ८०५ मतले पछि देखिन्छ । गठबन्धन दलबाट कांग्रेसका दिक्पाल शाही र एमालेका लक्ष्मीप्रसाद पोखरेलले प्रतिनिधिसभा सदस्यका लागि उमेदवारी दिएका छन् ।

स्थानीय तहको निर्वाचनमा चामुण्डा विन्द्रासैनी नगरपालिकामा गठबन्धनका दलले चार हजार ४०५ मत प्राप्त गरेका छन् भने एमालेले तीन हजार ९९२ मत प्राप्त गरेको छ । दुल्लु नगरपालिकामा गठबन्धनका दलले सात हजार ९०१ मत प्राप्त गरेका छन् एमालेले सात हजार १६० मत पाएको छ ।

भैरवी गाउँपालिकामा गठबन्धनका दलको अलग–अलग मतको नतिजालाई हेर्दा कांग्रेस र माओवादीभन्दा एमाले एक हजार ४१० मतले पछि देखिन्छ । कांग्रेसले स्थानीय तहका निर्वाचनमा तीन हजार ९७६ मत प्राप्त गरेको छ । माओवादीले एक हजार ३९३ मत प्राप्त गरेको छ । एमालेले तीन हजार ९६० मत प्राप्त गरेको देखिन्छ ।

क्षेत्र नम्बर–२ ‘क’ प्रदेशसभाका लागि गठबन्धन दलबाट घनश्याम भण्डारी र एमालेका तिलक रिजालले उमेदवारी दिएका छन् ।

यस्तै, ठाँटिकाध गाउँपालिकामा कांग्रेसका उमेदवारले दुई हजार ५७१, माओवादी केन्द्रले एक हजार ६१७ मत प्राप्त गरेको छ भने एमालेले दुई हजार ६९५ मत प्राप्त गरेको छ । स्थानीय तह निर्वाचनमा एमालेले विजय हासिल गरेको छ । क्षेत्र नम्बर–२ को ‘ख’ प्रदेशमा यी स्थानीय तह पर्छन् । यो प्रदेशसभाका लागि एमालेका विनोदकुमार शाह र गठबन्धन दलबाट योगेन्द्र शाहीले उमेदवारी दिएका छन् । रासस