काठमाडौं । प्रदेश र प्रतिनिधि सभा निर्वाचनका लागि सिट बाँडफाँट गर्न सहयोगका लागि सत्ता गठबन्धनले बनाएको समितिको पहिलो बैठक सम्पन्न भएको छ ।
सोमबार प्रधानमन्त्री निवास बालुवाटारमा बसेको बैठकले समितिको संयोजक तोकेको छ । संयोजकमा कांग्रेस नेता कृष्णप्रसाद सिटौला चयन भएका छन् ।
सोमबारको बैठकमा मंसिर ४ गते हुने निर्वाचनमा कुन मोडालिटीमा सिट बाँडफाँड गर्ने भन्ने विषयमा प्रारम्भिक छलफल भएको छ ।
नेकपा(एस) का नेता प्रमेश हमालका अनुसार मोडालिटीको बारेमा आ–आफ्नो दलमा छलफल गर्ने र अर्को बैठकमा दलहरूले प्रस्तुत गर्ने सहमतिसँगै आजको बैठक सम्पन्न भएको हो ।
सरकारका प्रवक्तासमेत रहेका कांग्रेस नेता ज्ञानेन्द्रबहादुर कार्कीकाअनुसार अर्को बैठक साउन २६ गते (बिहीबार) बस्नेछ ।
कार्यदलमा नेपाली कांग्रेसबाट नेता कृष्णप्रसाद सिटौला, महामन्त्री गगनकुमार थापा र ज्ञानेन्द्रबहादुर कार्की छन् ।
नेकपा (माओवादी केन्द्र)बाट देवप्रसाद गुरुङ र वर्षमान पुन छन् ।
नेकपा (एकीकृत समाजवादी)बाट उपाध्यक्ष प्रमेश हमाल र महासचिव बेदुराम भुसाल रहेका छन् ।
जनता समाजवादी पार्टीबाट रामसहाय यादव, रकम चेम्जोङ र राष्ट्रिय जनमोर्चाबाट हिमलाल पुरी र आनन्द शर्मा सदस्य रहेका छन् ।
