धनगढी । कैलालीमा जिल्ला समन्वय समितिको निर्वाचन यही जेठ ३० गते हुने भएको छ । जेठ २० गते मतदाता नामावली प्रकाशनबाट सुरु हुने निर्वाचन प्रक्रिया ३० गते मतदान भएर सम्पन्न हुने मुख्य निर्वाचन अधिकृतको कार्यालयले जानकारी दिएको छ । 

कार्यालयले सार्वजनिक गरेको तालिकाअनुसार २२ गते उमेदवारको मनोनयन दर्ता हुने छ । जेठ २४ गते उमेदवारको अन्तिम नामावली प्रकाशन हुने छ । यस्तै, २५ गते उमेदवारलाई चुनाव चिह्न प्रदान गरिने छ । यस्तै जेठ ३० गते बिहान ७ बजेदेखि दिउँसो १ बजेसम्म मतदान हुने निर्वाचन अधिकृतको कार्यालयले जनाएको छ ।

१३ पालिका भएको कैलालीमा २६ जनाले मतदाता गर्न पाउने छन् । जसमा एकजना स्वतन्त्र रूपमा विजयी भएका जनप्रतिनिधि छन् । एकजना सत्ता गठबन्धनविरुद्ध चुनाव लडेका कांग्रेसका नेता छन् । यी दुईजनाको मत जिल्ला समन्वय समिति गठन गर्न निर्णायक हुने देखिएको छ ।

जिल्ला समन्वय समितिको संयोजक बन्नका लागि १४ मत आवश्यक पर्छ । तर, सत्ता गठबन्धनसँग १३ मत मात्रै छ । कांग्रेससँग ८, माओवादीसँग ४ र एकीकृत समाजवादीसँग एक मत गरेर जम्मा १३ मत हुन्छ । यसमा पनि एकजना कारबाहीमा परेका छन् ।

गठबन्धनविरुद्ध उमेदवारी दिएको भन्दै कांग्रेस नेता तथा कैलारी गाउँपालिकाका अध्यक्ष राजसमझ चौधरीलाई कारबाही गरिएको थियो । उक्त कारबाही फुकुवा नभए गठबन्धनसँग पनि १२ मत मात्रै हुन्छ । त्यसकारण पनि सत्ता गठबन्धनलाई जिल्ला समन्वय समिति गठन गर्न सजिलो  छैन ।

कैलालीका चार स्थानीय तह जितेको नागरिक उन्मुक्ति पार्टी सँग ७ मत छ । एमालेसँग भने ५ मत मात्रै छ । एमाले र नागरिक उन्मुक्ति मिल्दा पनि १२ मत मात्रै हुन्छ । त्यसकारण यसले पनि समन्वय समिति गठन गर्न सम्भव छैन । ८ मत रहेको कांग्रेस र ७ मत रहेको नागरिक उन्मुक्तिले प्रमुख आफूले पाउनुपर्ने दाबी गरिरहेका छन् ।