काठमाडौं । सभामुख अग्निप्रसाद सापकोटाले संसद्को बजेट अधिवेशनलाई सौहार्दपूर्ण ढंगले सञ्चालन गर्न राजनीतिक दलहरूलाई अपिल गरेका छन् । सोमबार संसद् भवन अवलोकनका लागि नयाँ बानेश्वर पुगेका सभामुख सापकोटाले सञ्चारकर्मीहरूसँग कुराकानी गर्दै मंगलबार (भोलि)देखि सुरु हुने संसदको अधिवेशनलाई सौहार्दपूर्ण ढंगले सञ्चालन गर्न राजनीतिक दलहरूलाई आग्रह गरेका हुन् ।

उनले आफ्नो कुराकानी नभए पनि कानूनमन्त्रीले प्रमुख प्रतिपक्षी दल नेकपा (एमाले)का संसदीय दलका उपनेता सुवास नेम्वाङसँग कुराकानी गरिरहेको आफूले जानकारी पाएको बताए ।  

उनले भने, “अहिले मेरो तर्फबाट कुरा नभए पनि कानूनमन्त्रीजी सँग भेटेर छलफल गर्दा उहाँले विपक्षी दलका उपनेता सुभाष नेम्वाङसँग कुराकानी भएको बताएका छन्  । मलाई आशा छ, बजेट प्रस्तुत गर्ने, नीति तथा कार्यक्रम प्रस्तुत गर्ने, १५ गते अनिवार्य रूपमा बजेट प्रस्तुत गर्नुपर्ने संवैधानिक व्यवस्था हुनाले एउटा समझदारी बन्छ । पार्टीका नेताहरु सबैलार्ई  सौहार्दपूर्ण ढंगले सञ्चालन गर्नका लागि अपील पनि गर्छु ।’

सभामुख सापकोटाले बजेट अधिवेशन मूलरूपमा बजेटमै केन्द्रित हुने बताउनुभयो । सञ्चारकर्मीहरूको जिज्ञासाको जवाफ दिँदै उनले प्रधानन्यायाधीश चोलेन्द्र शमशेर जबरामाथि लागेको महाअभियोगको प्रस्तावमाथि बजेट पारित भइसकेपछि मात्रै छलफल हुने बताए ।

संसद्को बजेट अधिवेशन मंगलबार अपराह्न ४ बजे बस्ने गरी आह्वान गरिएको छ ।