बन्दुकको गोलीजस्तै मान्छेको बोली पनि निस्केपछि फर्काउन सकिँदैन । यसैले नेपालीमा ‘बोल्न पाएँ भन्दैमा प्याच्च नबोल्नुु भन्ने गरिएको हुनुपर्छ । कहिलेकाही त गोलीले भन्दा बोलीले धेरै हानि गर्छ । शक्तिको उन्माद र कुण्ठा मिसिएको बोलीले त अझ धेरै क्षति गर्छ । त्यसरी कुण्ठित व्यक्ति राज्यको शक्तिशाली अधिकारी पनि भयो भने त झन् क्षतिको मात्रा ठूलो र परिणाम भयावह हुन सक्छ । यसैले राज्यका उच्च पदका रहेकाहरूसँग विचार गरेरमात्र बोल्ने अपेक्षा गरिन्छ । विडम्बना, केही वर्ष यता नेपालमा भने जति माथिल्लो पदमा पुग्यो उति विचार नगरी बोल्ने प्रवृत्ति बढ्दै गएको छ । र, त्यसरी विवेक विचार केही नगरी उत्तेजक खभिव्यक्ति दिनेमा सबैभन्दा अगिल्लो पंक्तिमा प्धानमन्त्री केपी शर्मा ओली देखिएका छन् ।

त्यसो त, प्रधानमन्री ओली उत्तेजक र आक्रामक अभिव्यक्ति दिनेमा कहलिएकै हुन् । तर, विसं २०७४ सालको निर्वाचनमा संयुक्त घोषणापत्रमा चुनाव लडेका नेपाल कम्युनिस्ट पार्टीका दुई घटक एमाले र माओवादी केन्द्रले बहुमत हासिल गरेलगत्तै  देखि नै नेकपाका नेताहरू र विशेषगरी तत्कालीन नेकपा ९एमाले०का अध्यक्ष ओलीका अभिव्यक्तिहरू अरूप्रति  बढी नै आक्रामक र  दम्भपूर्ण हुन थालेका थिए । एमाले र माओवादी केन्द्रको एकतापछि त झन् नेपाल कम्युनिस्ट पार्टी ९नेकपा०का अध्यक्ष तथा प्रधानमन्त्री ओलीका अभिव्यक्ति उनको पदको गरिमाका लागि अशोभनीय हुँदै गए । सरकारका आलोचकहरूमाथि ‘अरिङ्गालु बनेर जाइलाग्न आफ्ना समर्थकहरूलाई उक्साउने उनको अभिव्यक्ति निकै आलोचित भएको थियो । प्रधानमन्त्री ओली र उनका समर्थकहरूका यस्ता अनगिन्ती अभिव्यक्ति पचाइसकेका नेपाली जनताले उनका असहिष्णु बोलीलाई गम्भीरतापूर्वक लिएनन् । सायद, यसलाई उनले जनताले उनका छुचा बोली रुचाएको ठाने ।

हालै नेकपाभित्रको किचलो छताछुल्ल भएपछि प्रधानमन्त्री ओली झन् कटु र आक्रामक अभिव्यक्ति दिन थाले । यतिन्जेल  उनका भनाइलाई ठट्यौली ठानेर रमाउँदै र उपहास गर्दै आएका व्यक्तिहरू पनि अहिले भने झस्किन थालेका छन् । आफ्नै पुराना सहकर्मीप्रति व्यक्तिगतरूपमा गरिएका उनका आक्रामक कटु अभिव्यक्तिले मर्यादाको सीमा उल्लंघन गरेको स्पष्टै सुनिन्छ । तर, सामाजिक सञ्जाललगायतमा भने नेकपाका नेताहरूबीचको स्तरहीन भनाभनका लागि चिन्ता व्यक्त भएको होइन । उत्तेजक अभिव्यक्ति दिँदादिँदै रौसिएर कतै प्रधानमन्त्री ओलीको छिमेकी वा अरू कुनै मित्रराष्ट्रप्रति लक्षित गरेर कटु अभिव्यक्ति पो दिइहाल्ने हुन् कि भनेर धेरैले चिन्ता प्रकट गर्न थालेका हुन् । प्रधानमन्त्री ओलीले कुनै मित्रप्रति समेत यस्तै अशोभनीय कटाक्ष, आक्षेप वा  कटु वचन प्रयोग गरे भने त्यसको असर सिङ्गो मुलुकले भोग्नुपर्ने हुनसक्छ । यसैले प्रधानमन्त्री ओलीले सार्वजनिक स्थानमा बोल्दा आफ्नो पदको गरिमा र बोलीले पार्नसक्ने असरका सम्बन्धमा पनि ध्यान दिनु आवश्यक र उचित देखिन्छ । व्यक्तिका रूपमा केपी ओलीका कटु वचनको परिणाम उनैले भोग्ने भए पनि प्रधानमन्त्रीका रूपमा उनको सार्जनिक दायित्व भएकाले सम्पूर्ण नेपालीले भोग्नुपर्ने हुन्छ भन्ने हेक्का रहोस् । देशको प्रमुख कार्यकारीलाई ‘विदूषकु भइरहने छुट हुँदैन ।