काठमाडौं । ऐतिहासिक धरोहर धरहरा पुनर्निर्माणले गति लिएको छ । काठमाडौंको सुनधारामा रहेको धरहरा ०७२ वैशाख १२ को भूकम्पमा पूर्ण क्षतिग्रस्त भएको थियो ।

धरहरा आन्तरिक र बाह्य पर्यटकको आकर्षण थियो । २ वर्षमा निर्माण सक्ने गरी जीआईईटीसी रमन कन्स्ट्रक्सनले काम सुरु गरेको धरहरा ३ अर्ब ४५ करोडमा बन्दै छ । गत पुसमा प्रधानमन्त्री केपी शर्मा ओलीले धरहरा पुनर्निर्माणको उद्घाटन गरेका थिए । राष्ट्रिय पुनर्निर्माण प्राधिकरणका सम्पदाविज्ञ राजुमान मानन्धरले धरहरामा सातौं तलाको काम भइरहेको बताए । 

तर सुरुवाती समयमा निर्माणले गति लिए पनि पछिल्लो समय काममा ढिलाइ भइरहेको छ । काम सुस्त हुँदा तोकिएको समयमै धरहरा बन्नेमा मानन्धर आशंका व्यक्त गर्छन् । उनका अनुसार टावर निर्माण अक्टोबर २०२० मै सकिए पनि ‘फिनिसिङ’ लगायत अन्य काम सकिने सम्भावना कम छ ।

निर्माणधीन धरहरा अत्याधुनिक र सुविधा सम्पन्न हुनेछ । २९ रोपनीमा बन्ने धरहरा २२ तलाको हुनेछ जसमध्ये तीन तला अन्डर ग्राउन्ड (भूमिगत) हुनेछन् । १८औं तलामा अवलोकलन कक्ष, म्युजियम, पुस्तकालय, वाटर फाउन्टेन, बगैंचा, रेस्टुरेन्ट हुनेछ । धरहरामा पढ्न चाहने, ध्यान गर्न चाहने तथा बस्न चाहने सबैका लागि सुविधा उपलब्ध हुनेछ ।

भूमिगत तीन तलामा पार्किङको व्यवस्था मिलाइनेछ । जहाँ ३५० गाडी र ६ हजार मोटरसाइकल राख्न सकिनेछ । गोश्वारा हुलाक भवन भएको ठाउँमा पार्क बनाइनेछ । पार्कभित्रै बस्ने ठाउँ, ढुंगेधारा, हरियाली, चमेना गृह हुनेछ ।

नेपाल चिनाउने सामग्री बेच्ने पसल हुनेछन् । धरहरा रातिको समयमा अझै रमणीय हुनेछ । रातको समयमा काठमाडौं उपत्यकाको झिलिमिली देखिने सिंगो स्तम्भकै रूपमा धरहरा रहने मानन्धर बताउँछन् ।
पुरानो धरहराले ओगटेको ६ रोपनी, गोश्वारा हुलाक र टक्सार विभागको २३ रोपनी गरी २९ रोपनी जग्गामा धरहरा बनाउने काम सुरु गरिएको हो ।

पहिलेको धरहराको ठुटोको १० मिटर पूर्वतिरको छेवैमा नयाँ धरहरा बनिरहेको  छ । जहाँ दैनिक १५० मजदुरले काम गरिरहेका छन् । भत्किएको (पुरानो) धरहराभन्दा नयाँ धरहराको चौडाइ धेरै छ । जहाँ दुईवटा लिफ्ट पनि हुनेछ । साथै एउटा भ¥याङ पनि रहन्छ । लिफ्ट र भ¥याङबाट धरहरा चढ्न सकिनेछ ।

सन् १८३२ मा भीमसेन थापाले बनाएको ११ तले धरहरा ९० सालको भूकम्पले क्षतिग्रस्त भएपछि ९ तलामा सीमित भएको थियो ।
तस्बिर : हरिशजंग क्षेत्री/बाह्रखरी