काठमाडौं । भारतबाट आयातीत २० ट्रक माला (सयपत्री) कालीमाटी बजारमा बेच्न सुरु गरिएको छ । चार दिन अघि बालाजु औद्योगिक क्षेत्रमा स्टोर गरिएको माला आजबाट बेच्न सुरु गरिएको हो । कालीमाटी बजारमा प्रतिगोटा मालाको होलसेल मूल्य एक सय रुपैयाँ छ ।

भारतीय माला आएसँगै नेपाली  पुष्प व्यवसायीहरु भने आन्दोलनमा उत्रिएका छन् । भारतबाट आयातीत फूल अबैध भएकाले बजारमा सस्तो पर्ने भएकाले नेपालमा उत्पादित फूलले बजार नपाउँने भन्दै व्यसायीहरु आन्दोलनमा उत्रिएका हुन् ।

यसैबीच फ्लोरी कल्चर एशोसीएसन नेपाल (फ्यान)का अध्यक्ष कुमार कसजु श्रेष्ठले अबैद्य तरिकारले आएको फूलबारे  सरकारी निकायससँग आग्रह गर्दा कुनै चासो नदेखाएका बताए । “सरोकारवाला निकायसँग आग्रह गरेका हौं । तर कसैले चासो देखाएन । त्यसैले पुष्प व्यवसायीहरुको अधिकारीका लागि आन्दोलन गर्नुपर्ने अवस्था सिर्जना भएको हो,” उनले भने । 

जिल्ला प्रशासन कार्यालय काठमाडौं, प्लान्ट क्वारेन्टाइन विभाग, राजश्व तथा अनुसन्धान विभाग, भन्सार विभाग, बाणिज्य विभागलाई पत्राचार गर्दा पनि कुनै पनि निकायले छानविन नगरेको श्रेष्ठको गुनासो छ । 

“किसानले उत्पादन गरेका फूल बजारमा जान पाउनु पर्छ भन्ने हाम्रो माग हो,” यस्तै, अबस्था रहे पुष्प व्यवसाय  गर्नुको औचित्य छैन,” उनले भने ।  

यता कालीमाटी फलफूल तथा तरकारी बजार विकास समितिले भने भारतबाट आयातीत फूल अबैध नभएको बताएको छ । बैद्य अबैद्य जाँचबुझ गर्ने धेरै निकाय भएकाले आँखा छलेर ल्याउन सम्भव नहुने समितिको भनाइ छ ।  

कालिमाटीका व्यवसायी दीपकप्रसाद पौडेलले भारतबाट आयादित फूल अवैद्य नभएको बताउँछन् । “व्यवसाय गर्न सबैले पाइन्छ । सबै आयातीत फूलको कागजात तथा खरिद र बिक्री दुबै बिल हामीसँग छ,” उनले भने ।