काठमाडौं । ओस्कार इन्टरनेशनल कलेज चलचित्र सम्बन्धि पढाइ हुने त्रिभुवन विश्वविद्यालयबाट सम्बन्धन प्राप्त नेपालको एक मात्रै कलेज हो । चलचित्रसँग सम्बन्धित अभिनय, निर्देशन, ध्वनी, क्यामेरा र सम्पादन यो कलेजमा पढाइ हुन्छ । विसं २०६१ सालबाट सञ्चालनमा आएको यो कलेजमा अहिलेसम्म करिब सात सय विद्यार्थी अध्ययन गरिसकेका छन् । स्नातक तहको अध्ययन हुने यो कलेजका विद्यार्थी अहिलेको चलचित्र बजारमा थुप्रै छन् ।

नायक राजवल्लभ कोइराला ओस्कार इन्टरनेसनल कलेजको पहिलो ब्याचका विद्यार्थी हुन् । कुनै समय नेपाली चलचित्रमा निकै रुचाइएका यी अभिनेता ‘पर्खि बसेँ’, ‘हे युवा’, ‘गुरु दक्षिणा’, ‘सम्झना’, ‘छोडी गए पाप लाग्ला’, ‘मसान’, ऋतु’ लगायत दुई दर्जनभन्दा धेरै चलचित्रमा उनले अभिनय गरे । राजवल्लभ अहिले अमेरिकामा छन् । 

ओस्कार कलेजका पहिलो व्याचकै विद्यार्थी हुन् निर्देशक विनोद पौडेल । उनले निर्देशन गरेको चलचित्र हो, ‘बुलबुल’ । ‘बुलबुल’का लेखक पनि रहेका विनोदले सुरुआती दिनमा केही चलचित्रमा अभिनयसमेत गरेका थिए । उनी ८ वर्षयता सोही कलेजको प्रिन्सिपल छन् । 

चलचित्र ‘लुट’ निर्देशक निश्चल बस्नेत पनि ओस्कार इन्टरनेसनल कलेजकै विद्यार्थी हुन् । ‘लुट’, ‘टलकजङ्ग भर्सेस टुल्के’, ‘लुट–२’ निर्देशन गरेका निश्चल अहिले अभिनयमा व्यस्त छन् । ‘दुई रुपैयाँ’ लगायतका चलचित्रमा अभिनय गरेका निश्चलले पछिल्लो समय अभिनय गरेको चलचित्र ‘प्रसाद’ हो । 

नेपाली चलचित्रलाई अन्तर्राष्ट्रिय जगतमा पुर्याउने निर्देशक मीन भाम पनि ओस्कारकै विद्यार्थी हुन् । ओस्कार कलेज पढेका उनले निर्देशन गरेको चलचित्र ‘कालो पोथी’ले विभिन्न अन्तर्राष्ट्रिय फिल्म फेष्टिवलमा सहभागिता जनाउनुका साथै विभिन्न टाइटलसमेत जितेको थियो । 

नेपाली चलचित्र अन्तर्राष्ट्रिय फिल्म फेष्टिवलमा सहभागी हुनसक्छन् र आफ्नै विषय आफ्नै शैलीमा बनाए त्यसले विदेशमा पनि राम्रो माइलेज पाउनसक्छ भन्ने उनले प्रमाणीत गरे । उनीसँगै यो श्रेय लिनेमा ‘ह्वाइट सन्’ निर्देशक दीपक रौनियार पनि हुन् । 

निर्देशक तथा अभिनेता जोयस पाण्डे पनि ओस्कारकै विद्यार्थी हुन् । जोयसले चलचित्र ‘साँघुरो’ निर्देशन गरेर वाहवाही बटुलेका थिए । जोयस अभिनेता पनि हुन् । चलचित्र ‘बुलबुल’मा गाडी मिस्त्रीको क्यरेक्टर गर्ने जोयश नै हुन् । 

अभिनेता मुकुन भुषाल पनि ओस्कारकै विद्यार्थी हुन् । मुकुन पहिलो चलचित्रबाटै दर्शकको मन जित्न सफल कलाकार हुन् । चलचित्र ‘बुलबुल’मा मुकुनले चोपेन्द्रको भूमिका निभाएका थिए । मुकुन अहिले ओस्कारमा पढाउन थालेका छन् । उनी अभिनय पढाउँछन् । पूर्णेदू झा पनि ओस्कार इन्टरनेशनल कलेजकै विद्यार्थी हुन् । झाले चलचित्र ‘संरक्षण’ र ‘चौका दाऊ’ निर्देशन गरेका छन् ।     

निर्देशक प्रविण स्याङ्वोले पनि ओस्कार कलेजमै फिल्म पढेका हुन् । प्रविणले ‘अध्याय’ र ‘कथा–७२’ निर्देशन गरेका छन् । अभिनेत्री सुजता कोइरालाले पनि ओस्कारमै अभिनय पढेकी हुन् । उनले चलचित्र ‘मञ्जरी’मा अभिनय गरेकी थिइन् । ‘मञ्जरी’बाट तारिफ बटुले पनि उनी अभिनयमा बसिनन् । उनी अहिले अमेरिकामा छिन् ।

चलचित्र ‘अपवाद’ निर्देशन गरेका सुवास कोइराला पनि ओस्कार कलेज मै पढेका हुन् । सुवास अहिले अन्तर्राष्ट्रिय फिल्म फेस्टिवल लक्षित चलचित्र बनाइरहेका छन् । 

नीर शाहको पहलमा स्थापना भएको यो कलेजको नेतृत्व डा. टिकाराम पोखरेल, लक्ष्मीनाथ शर्मा, घनश्याम खतिवडाले गरिसकेका छन् भने अहिले विनोद पोडैल कलेज प्रमुख छन् ।  अभिनय, निर्देशन, ध्वनी, क्यामेरा र सम्पादनका कक्षा सञ्चालन गर्दै आएको कलेजले यो वर्षबाट तीन वर्षे बीएको कोर्षलाई चार वर्षे बनाउँदैछ । पौडेलका अनुसार अब साविक पढाइ हुँदै आएका विषयसँगै पाठ्यक्रममा नयाँ विषय पनि थपिँदैछ । 

प्रोडक्सन डिजाइन, भिज्युअल एन्थ्रोपोलोजी, वल्र्ड लिट्रेचर मोभ्मेन्ट र अदर फम्स अफ आर्ट विषय थप गर्दैछ । जसमा रिसर्च मेथोडोलोजी, इङलिस लिट्रेचर, ड्रामा, पेन्टिङ र म्युजिक समावेश हुनेछन् । “थप गरिएको हाम्रो कोर्षले व्यक्तिलाई समाजप्रति थप जिम्मेवार बनाउने छ,” पौडेल भन्छन्, “राम्रो काम र व्यवहारसँग साक्षात्कार गराउने छ । आर्ट पैसासँग तुलना हुँदैन भन्ने बुझाउने छ ।”