काठमाडौं ।  सरकारले व्यवस्थापिका–संसद्मा पेस गरेको राजनीतिक दल सम्बन्धी कानुनलाई संशोधन र एकीकरण गर्न विधेयकमा संशोधन गरेर थ्रेसहोल्डको व्यवस्था गर्नुपर्ने भन्दै कांग्रेसले आन्तरिक छलफल जारी राखेको छ ।

आज पनि कांग्रेस आन्तरिक छलफलमा छ । थ्रेसहोल्डको व्यवस्था गर्ने गरी कांग्रेसले बिहीबार पनि आन्तरिक छलफल गरेको थियो ।

पार्टीका शीर्ष नेताहरूको बैठकपछि आजै संशोधन प्रस्ताव दर्ता गर्ने तयारी छ । कांग्रेस प्रमुख सचेतक चिनकाजी श्रेष्ठले प्रमुख नेताहरुसँग आज पनि छलफल गरेर निष्कर्ष निकाल्ने बताए ।

यसअघि १० हजारको हस्ताक्षर बुझाउनुपर्ने भए पनि अहिले पाँचसयको हस्ताक्षरको व्यवस्थासहित विधेयक संसद्मा विचाराधीन अवस्थामा छ ।

कांग्रेसका सांसद भरत कुमार साहले संशोधन प्रस्ताव दर्ता गराइसके पनि पार्टीको आधिकारिक धारणासहितको संशोधन प्रस्ताव दर्ताको प्रयास भइरहेको एक नेताले बताए ।

नेकपा एमालेका सांसदहरुले पनि पाँच प्रतिशतसम्म थ्रेसहोल्ड राख्नुपर्ने व्यवस्था गर्नुपर्ने भन्दै यसअघि नै संशोधन प्रस्ताव दर्ता गराएका छन् ।

एमालेका प्रमुख सचेतक भानुभक्त ढकाल, राजेन्द्र पाण्डे र रवीन्द्र अधिकारीले राखेको संशोधन प्रस्तावमा भने प्रत्यक्षतर्फ एकसिट जितेको वा कम्तीमा तीन प्रतिशत मत ल्याएको दलले मात्रै समानुपातिकतर्फ सिट पाउने व्यवस्था गर्नुपर्ने उल्लेख छ ।  कांग्रेस सांसद साहले राखेको संशोधन प्रस्तावमा भने ५ प्रतिशत थ्रेसहोल्डसहितको व्यवस्था हुनुपर्ने उल्लेख छ ।