नेपित । म्यानमारमा सैन्य दमनका कारण कम्तीमा ४३ जनाको ज्यान गएको छ । बालबालिकाको अधिकारको क्षेत्रमा काम गर्ने संस्था ‘सेभ द चिल्ड्रेन’काअनुसार म्यानमारमा सेनाको दमनका कारण हालसम्म ४३ बालबालिकाको ज्यान गएको हो ।
सेनाले सत्ता हातमा लिएयता ज्यान गुमाएका ५३६ जनामध्ये ४३ बालबालिका रहेको जानकारी दिँदै सेभ द चिल्ड्रेनले म्यानमारको स्थिति निकै दर्दनाक रहेको बताएको छ । ज्यान गुमाउनेमा एक जना ६ वर्षीया बालिका समेत रहेकी उक्त संस्थालाई उदृत गर्दै बीबीसी हिन्दीले जनाएको छ ।
पछिल्लो समय सेनाले प्रदर्शन दबाउन कडा कदमहरू चालिरहेको छ । म्यानमारको सीमान्त इलाकाहरुमा सेना र नश्लीय अल्पसंख्यक समूहबीच संघर्ष बढिरहेको अन्तर्राष्ट्रिय सञ्चारमाध्यमले जनाएका छन् । म्यानमारका लागि संयुक्त राष्ट्र संघीय दूतकाअनुसार यहाँ थप रक्तपात हुने सम्भावना छ ।
गत वर्षको नोभेम्बरमा भएको निर्वाचनमा प्रजातन्त्रवादी नेतृ आङ सान सूकीको दल नेशनल लिग फर डेमोक्रेसी (एनएलडी)ले बहुमत ल्याएको थियो । आफ्नो पक्षमा मत नआएपछि निर्वाचनमा व्यापक धाँधली भएको भन्दै सेनाले सत्ता हातमा लिएको थियो । त्यसपछि सैन्य शासनको विरोधमा भइरहेका प्रर्दशन थप हिंसात्मक बन्दै गएको छन् ।