काठमाडौं । नेकपा दाहाल–नेपाल समूहले संसदीय दलले गरेको निर्णयका बारेमा जानकारी औपचारिकरुपमा गराउन संसद् सचिवालयका महासचिव भरत गौतमको कार्यकक्षमा पुगे पनि संसद् सचिवालयले अहिले दर्ता गर्न नसकिने जनाएको छ ।
लामो समयदेखि नेकपाका शीर्ष नेता र महासचिवसहित संसद् सचिवालयका कर्मचारीको गलफती भइरहेको छ ।
महासचिव गौतमले निर्वाचन आयोगले पार्टीको विवाद टुंगो लगाइदिएपछि मात्रै निर्णय गर्ने जानकारी गराएका थिए ।
त्यसपछि दाहाल–नेपाल समूहका नेताहरु आक्रोशित बनेका थिए ।
“के हामी गृह मन्त्रालयमा दर्ता गर्न जाने त ?,” महासचिवको कार्यकक्षमा रहेका नेकपाका एक नेताले भने, “न्युनतम प्रशासनिक काम पनि गर्न नसके पछि किन महासचिवको कुर्सीमा बसेको ?”
अहिले महासचिवले संसद् सचिवालयकै सचिवहरुसँग छुट्टै परामर्श गरेका छन् ।