काठमाडौं । सर्वोच्च अदालतले पुस ५ गते प्रतिनिधिसभा विघटन गर्ने कदमलाई असंवैधानिक ठहर गरिदिएपछि प्रधानमन्त्री केपी शर्मा ओलीलाई राजीनामा दिन चौतर्फी दबाब छ ।
प्रचण्ड-नेपाल समूहले संसदीय दलको बैठक राखेरै ओलीलाई सहज निकास दिन भनिसकेका छन् । आफैँले ‘गला’ निमोठेको, हत्या गर्न उद्यत भएको संसद्सामु मुख देखाउन ओलीको नैतिकताले नदिनुपर्ने हो भनेर सांसदहरूले धारणा राखेका छन् ।
“प्रधानमन्त्रीले यतिबेलासम्म नैतिकताका आधारमा राजीनामा दिइसक्नुपर्ने हो । तर, राजीनामा नदिइसकेकाले के गर्ने भन्ने अहिलेको बहसको विषय हो,” संसदीय दलको बैठकपछि प्रमुख सचेतक देव गुरुङले भने, “संविधानको रक्षा गर्नुपर्ने सरकारको दायित्व हो । संविधानको रक्षक होइन भक्षक बन्न उद्यत रह्यो । संविधानलाई भक्षण गर्न लागिराखेको छ । त्यसको कुनै आत्मानुभूति छैन ।”
प्रधानमन्त्रीमा ‘मातृहत्या (जुन संसद्ले आफूलाई जन्मायो, प्रधानमन्त्री बनायो, त्यसैलाई हत्या गर्ने)’ प्रवृत्ति देखियो । त्यस्तो प्रकारको प्रवृत्तिले संसद्मा गएर कुन हैसियतले, कुन नाकले फेस गर्ने ? कुन नाकले समर्थन गर भनेर भोट माग्ने ?” गुरूङको प्रश्न थियो ।
विभाजित नेकपाले मात्र नभई अहिले सबैजसो राजनीतिक दल, प्रबुद्ध समुदायले प्रधानमन्त्रीलाई सहज निकास दिन भने पनि प्रधानमन्त्री आफ्नो अडानमा निर्भीक रहेको उनीनिकट स्थायी कमिटी सदस्य पृथ्वीसुब्बा गुरुङ बताउँछन् ।
“राजीनामा दिएर किन उनीहरू (प्रचण्ड-माधवकुमार नेपाल) लाई सजिलो बनाउने ?” उनी प्रश्न गर्दै भन्छन्, “प्रधानमन्त्री ओलीले राजीनामा दिनुपर्ने के कारण छ र ?”
प्रधानमन्त्री ओली पक्षको स्थायी कमिटीको बैठक बुधबार बसेको थियो । बैठक भोलि पनि जारी रहने र छिट्टै संसदीय दलको बैठक बोलाउने तयारी भइरहेको प्रवक्ता प्रदीप ज्ञवालीले जानकारी दिएका छन् ।
एक स्थायी कमिटी सदस्यका अनुसार आजको बैठकमा प्रधानमन्त्रीको राजीनामाबारे बहस, छलफल भएको थियो । सदस्यहरूले ओलीले सहज निकास दिन नहुने नै धारणा राखेको ती सदस्य बताउँछन् । “संसद् पुनःस्थापनापछि ओलीले खेल्ने मौका पाउनुभएको छ,” ती सदस्य भन्छन्, “मुलुक फोहोरी संसदीय खेलमा प्रवेश गरिसकेको छ । यस्तो परिस्थितिमा धेरै आदर्शको कुरा गरेर हुँदैन । नैतिकता प्रदर्शन गरेर पनि हुँदैन । आफू पनि त्यही प्रक्रियामा छिर्नुपर्छ ।”
राजनीतिक लडाइँ भएकाले संसद्मा प्रतिनिधित्व गर्ने दलसँग छलफल गर्ने र यही सरकारलाई टिकाउन प्रयत्न गर्नुपर्ने सुझाव आएको उनी बताउँछन् ।
“ओलीसँग अझै पनि धेरै विकल्प छ । कांग्रेस, जसपासहितको नेतृत्वमा आफ्नो सरकार बनाउने कि, उनीहरूलाई समर्थन गरेर प्रचण्ड-माधवकुमार नेपालहरूलाई बाहिर राख्ने हो कि, कसैलाई समर्थन नगरी प्रतिपक्षीको बेन्चमा बस्ने हो कि, या त पुरानै अवसरवादीसँग एकता गर्ने कि भन्ने विकल्प हाजिर छन् । त्यसकारण अहिले नै राजीनामाको विकल्पबारे किन सोच्ने ?” उनको भनाइ छ ।
स्थायी कमिटी सदस्यहरूको यो रायमा प्रधानमन्त्री ओली कन्भिन्स छन् ।
यद्यपि पार्टी प्रवक्ता प्रदीप ज्ञवालीले भने अरू राजनीतिक दलहरूसँगको परामर्श, छलफलपछि एउटा निचोडमा पुग्ने बताएका थिए । स्थायी कमिटीमा ओलीलाई राजीनामा नदिन सुझाउने मात्र छैनन् । उनीनिकट स्थायी कमिटी सदस्य किरण गुरुङले राजीनामा दिन सुझाउँछन् ।
“संसद् पुनःस्थापना भइसकेपछि अदालतको फैसलालाई सम्मान गर्नुपर्ने हुन्छ । अब उहाँका निम्ति दुईवटा विकल्प छन् । एउटा नैतिकता आधारमा राजीनामा दिने । अर्को, अविश्वासको प्रस्तावको सामना गर्ने,” उनी भन्छन् । हिजोसम्म ओलीकै कोर्टमा बल रहेकाले सर्वोच्चको फैसलापछि प्रचण्ड-माधवको क्याम्पमा सरेको गुरुङ बताउँछन् ।