काठमाडौं । सर्वोत्तम सिमेन्टले उत्पादन क्षमता बढाएर दैनिक ६० हजार बोरा पुर्याएको छ । यसअघि उद्योगले दैनिक ४० हजार बोरा सिमेन्ट उत्पादन गर्दै आएको थियो ।
पाल्पा तथा चितवनको चुनढुंगा मिश्रणबाट गुणस्तरीय सिमेन्ट उत्पादन गर्दै आएको कम्पनीले क्षमता बढाएको हो । आफ्नो सिमेन्ट उत्पादन अझै बृहत् भएपछि सिमेन्ट उपभोक्तामाझ गुणस्तरीय तथा अत्याधुनिक प्रविधिबाट उत्पादित सिमेन्टको पहुँच अझै सरल तथा सुलभ बन्ने कम्पनीको विश्वास छ । सर्वोत्तम सिमेन्ट देशका महत्त्वपूर्ण आधारस्तम्भहरु अनि ठूला परियोजना तथा गौरवशाली आयोजनालगायत पुल, बाँध, हाइड्रोपावर, धावनमार्गदेखि हाउजिङ कम्पनीको समेत पहिलो रोजाइमा पर्दै आएको कम्पनीले जनाएको छ ।
कम्पनीका ब्रान्ड म्यानेजर गोपाल शारदाका अनुसार सर्वोत्तम सिमेन्ट अत्याधुनिक युरोपियन भीआरएम प्रविधिद्वारा उत्पादन गर्ने नेपालकै पहिलो उद्योग हो । आइएसओ ९००१ गुणस्तर प्रमाणित, १४००१ वातावरण-मैत्री प्रमाणित र नेपाल गुणस्तर प्रमाणितसमेत भएको कम्पनीले ग्रिन सर्वोत्तम ओपीसी र सौरभ ग्रिन पीपीसी नामक ब्रान्डका सिमेन्ट नेपालभर बिक्री गर्दै आएको छ ।