काठमाडौं । पूर्वसभामुख दमननाथ ढुंगानाले अदालतको अवहेलना मुद्दा मापदण्ड स्थापना गर्ने मुद्दा भएको बताएका छन् । 

अदालतको अवहेलनाको मुद्दामा न्यायाधीश मनोजकुमार शर्माको एकल इजलासले ढुंगानालाई सात दिनभित्र लिखित जवाफ पेस गर्न आदेश गरेको छ । ढुंगानाले प्रक्रियाबमोजिम नै आदेश भएको भन्दै आदेशको पालना गर्दै लिखित जवाफ दिने बताए । “आदेशको पालना गर्नैपर्छ । जवाफ दिन्छु । प्रक्रियाबमोजिम नै भएको छ,” उनले भने, “यो मापदण्ड स्थापना गर्ने मुद्दा हो । प्रजातन्त्रमा, खुला समाजमा विचारको स्वतन्त्रता कति हो ? र, कहिले अदालतको अवहेलना हुन्छ ? भन्ने कुराको एउटा मापदण्ड स्थापना गर्ने मुद्दा हो ।”

प्रतिनिधिसभा विघटन असंवैधानिक भएको बताउँदै आएका ढुंगानाले बोलेको विषयले अदालतको अवहेलना भएको भन्दै रिट दायर भएको थियो । सोही रिटमा आदेश गर्दै बिहीबार शर्माको इजलासले भनेको छ, “मागबमोजिम अवहेलनामा कारबाही किन हुनु नपर्ने हो ? म्याद प्राप्त भएको मितिले बाटाका म्यादबाहेक सात दिनभित्र सबै व्यवहोरा खुलाई आफैं लिखित जवाफ पेस गर्नूहोला भनी विपक्षीका नाउँमा आदेश र निवेदनको प्रतिलिपिसमेत साथै राखी म्याद जारी गरी लिखित जवाफ प्राप्त भएपछि वा अवधि नाघेपछि पेस गर्नू ।”