नेपालगन्ज । सशस्त्र प्रहरी बल (एपीएफ) का गोपीचन्द्र पार्कीले छैटौं धारा नेपालगन्ज म्याराथनको उपाधि जितेका छन् । महिला हाफ म्याराथनमा एपिएफकै पुष्पा भण्डारी च्याम्पियन बनेकी छिन् ।

दुवै गत वर्ष नेपालमा आयोजना भएको १३औं दक्षिण एसियाली खेलकुद (साग) का पदक विजेता खेलाडी हुन् । गोपीले ५ हजार मिटरमा स्वर्ण र पुष्पाले म्याराथनले रजत पदक जितेका थिए । उपाधिसँगै पार्कीले अर्को वर्ष जापानमा आयोजना हुने टोकियो ओलम्पिकका लागि आफ्नो स्थान सुरक्षित गरेका छन् । २५ खेलाडीको सहभागिता रहेको म्याराथनमा पार्कीले २ घण्टा १८ मिनेट ५९ सेकेन्डमा दौड पूरा गरेका थिए । नेपाली खेलाडीले स्वदेशमा दौड पूरा गरेको यो उत्कृष्ट समय हो । यसअघि भूमिराज राई २ घण्टा २० मिनेट ४० सेकेन्डको उत्कृष्ट समय थियो ।

बीपीचोक सुरु भएर कोहलपुर चौराहा, उत्तरतर्फ कौशिलानगर पुगेर सोही रुट हुँदै बीपीचोक पुगेर दौड पूरा गर्ने क्रममा नेपाली सेनाका कृष्ण बस्‍नेत दोस्रो भएका थिए । बस्‍नेतले २ घण्टा २० मिनेट ४९ सेकेन्डमा दौड पूरा गरे । त्यस्तै सेनाका खगेन्द्र भाटले तेस्रो स्थान हासिल गर्न २ घण्टा २७ मिनेट २८ सेकेन्ड समय लगाए ।

पुष्पाले १ घन्टा २६ मिनेट ५४ सेकेन्डमा दौड पूरा गरेकी थिइन् । महिलातर्फ १० खेलाडी दौडँदा जुम्लाकी मन्जु राउत (१ घण्टा ३० मिनेट ०७ सेकेन्ड) दोस्रो र दाङकी शर्मिला घर्ती (१ घण्टा ३८ मिनेट १४ सेकेन्ड) तेस्रो भएकी थिइन् ।

सुदूरपश्चिमकी शकुन्तला ठगुन्‍ना चौथो, दाङकी अनिशा चौधरी पाँचौं, बर्दियाकी कल्पना चौधरी छैटौं, बाँकेकी अंकिता गुरुङ सातौं र कास्की ललिता लामिछाने आठौं भएकी थिइन् । पुष्पाले ३० हजार, मन्जुले २० हजार र शर्मिलाले १० हजार रुपैयाँ प्राप्त गरिन् । शकुन्तलाले ८ हजार, अनिशाले ७ हजार, कल्पना ५ हजार, अंकिताले २ हजार ललिताले १ हजार रुपैयाँ प्राप्त गरिन् ।

म्याराथनमा सेनाका नवराज साउद चौथो, ज्ञानप्रसाद भट्टराई पाँचौं, सुदूरपश्चिमका मुकेशबहादुर पाल छैटौं, कालीकोटका जगदीश गिरी सातौं र दाङका सनम घर्ती आठौं भए ।

गोपीले ७५ हजार, कृष्णले ३० हजार, र खगेन्द्रले १० हजार रुपैयाँ प्राप्त गरे । नवराजले १०, ज्ञानप्रसादले ८, मुकेशले ७ हजार, जगदीश ६ र सनमले ५ हजार रुपैयाँ प्राप्त गरे ।