काठमाडौं । नेपालमा कोरोना संक्रमितको संख्या पाँच सय नाघेको छ । पछिल्लोपटक २० जनाको पीसीआर रिपोर्ट पोजेटिभ आएसँगै नेपालमा संक्रमितको संख्या ५ सय ७ पुगेको छ ।
स्वास्थ्य तथा जनसंख्या मन्त्रालयका अनुसार बाँकेमा १४ र सुदूरपश्चिम प्रदेशका विभिन्न जिल्लामा पाँच नयाँ संक्रमित थपिएका छन् । बैतडीको शिवनाथ १ का २२ वर्षीय पुरुष, डडेलधुराको परशुराम नगरपालिकाका २८ वर्षीय पुरुष र कैलालीका १९, २३ र २६ वर्षीय पुरुषमा संक्रमण पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताए ।
उनीहरूको सेती प्रादेशिक अस्पतालमा नमुना परीक्षण गरिएको थियो । यसैगरी बाँकेमा १३ जनामा संक्रमण देखिएको छ । भेरी अस्पतालमा भएको परीक्षणमा १८ देखि ६१ उमेर समूहका पुरुषहरूमा कोरोना पोजेटिभ देखिएको हो । १३ जना नरैनापुरका छन् । एकजना राप्ती सोनारीका छन् । यस्तै मोरङको रतुमाइका ४१ वर्षीय पुरुषमा पनि पोजेटिभ देखिएको छ ।
शुक्रबार एकै दिन २१ जना उपचारपछि निको भएर डिस्चार्ज भएका छन् । सुशील कोइराला प्रखर क्यान्सर अस्पतालबाट नेपालगन्ज उपमहानगरपालिका ८ का २१ जना डिस्चार्ज भएको प्रवक्ता देवकोटाले बताए । डिस्चार्ज हुनेमा ९ महिला र १२ पुरुष छन् । १ देखि ६० वर्ष उमेर समूहका उनीहरू १७ देखि २०औं दिनमा निको भएर डिस्चार्ज भएका हुन् । यस्तै अहिलेसम्म प्रदेश १ मा २६, प्रदेश २ मा ६ जना, वाग्मती प्रदेशमा ९, गण्डकी प्रदेशमा २ र सुदूरपश्चिम प्रदेशमा पाँचजना निको भएर घर फर्किएका छन् ।
पछिल्लो चौबीस घण्टामा पीसीआर विधिबाट ३ हजार ८ सय १९ जनाको नमुना परीक्षण भएको छ । आरडीटी विधिबाट ३४ सय २१ जनाको परीक्षण भएको छ । अहिलेसम्म विधिबाट ४२ हजार चार सय ८८ र आरडीटी विधिबाट ८२ हजार एक सय १६ जनाको नमुना परीक्षण भएको छ ।
प्रदेश १ मा ९ हजार ९ सय २०, प्रदेश २ मा ६ हजार २ सय ९५, वाग्मती प्रदेशमा १९ हजार ९३ र गण्डकी प्रदेशमा ७ हजार १८ जनाको आरडीटी परीक्षण भएको छ । यसैगरी प्रदेश ५ मा ११ हजार ४ सय ८१, कर्णाली प्रदेशमा आठ हजार ६ सय १ र सुदूरपश्चिम प्रदेशमा १९ हजार ७ सय ८ जनाको आरडीटी परीक्षण भएको प्रवक्ता देवकोटाले बताए ।
यसैगरी प्रदेश १ मा ५८ जना, प्रदेश २ मा १ सय ५५, वाग्मती प्रदेशमा १८ र गण्डकी प्रदेशमा तीनजना आइसोलेसनमा उपचाररत छन् । यसैगरी प्रदेश ५ मा २ सय ३ जना, कर्णाली प्रदेशमा १ र सुदूरपश्चिम प्रदेशमा ५ गरी ४ सय ३३संक्रमित आइसोलसनमा उपचाररत रहेको प्रवक्ता देवकोटाले बताए ।
प्रदेश १ मा १४ सय १४, प्रदेश २ मा ५ हजार ९ सय ६, वाग्मती प्रदेशमा ४ सय ७८ र गण्डकी प्रदेशमा ६ सय ७८ जना क्वारेन्टाइनमा छन् । यस्तै प्रदेश ५ मा १५ हजार ९ सय ८९, कर्णाली प्रदेशमा ७ सय ३५ र सुदूरपश्चिमा २ हजार ६ सय २९ गरी देशभरी २७ हजार ८ सय २९ जना क्वारेन्टाइनमा छन् ।