जुम्ला । कोरोना भाइरस (कोभिड-१९) सङ्क्रमण रोकथाम तथा नियन्त्रणका लागि सरकारले लागू गरेको लकडाउनका कारण आफ्नो गृह जिल्लामा पुग्न नसकेर अलपत्र परेका नागरिकलाई जुम्लाका युवा स्वयं सेवक समूहले राहत प्रदान गरेको छ ।
नुवाकोटको विदुर नगरपालिका १, त्रिशुलीका रविन तामाङ र सुरेन्द्र तामाङलाई २५ किलो चामल, २ किलो दाल, २ पाकेट तेल र सय रुपैयाँको रिर्चाज कार्ड राहत स्वरुप प्रदान गरेको समूहका बालकृष्ण बुढाले बताए । त्यसैगरी समूहले भरतपुर महानगरपालिका २७, चितवनका जयबहादुर कुमाल र भीष्म महतालाई तातोपानी गाउँपालिका २, की सत्यदेवी डाँगीले आश्रय दिएकी छन् । उनीहरुलाई पनि उक्त राहत दिइएको थियो ।
वडामा निगरानी केन्द्र
पातारासी गाउँपालिका जुम्लाले पोखरा, काठमाडौं, बुटवल, नेपालगन्ज र सुर्खेतमा अलपत्र परेका नागरिकलाई उद्धार गरेर ल्याउन थालेपछि हरेक वडामा निगरानी केन्द्र निर्माण गरेका छन् ।
लकडाउनका कारण नेपालका विभिन्न जिल्लामा अलपत्र परेका आफ्ना नागरिकलाई उद्धार गर्ने निर्णय भएको पातारासी गाउँपालिका अध्यक्ष लछिमन बोहोराले जानकारी दिए । अलपत्र परेका नागरिकलाई काठमाडौं, पोखरा, नेपालगन्ज र सुर्खेतबाट गाडीमा ल्याउन सूचना प्रकाशित भइसकेको छ ।
अलपत्र परेका नागरिकले गाउँपालिकाले तोकेको सम्पर्क व्यक्तिसँग सम्पर्क गर्न आग्रह गरिएको पातारासी गाउँपालिका स्वास्थ्य शाखा प्रमुख तथा कोरोना रोकथाम तथा नियन्त्रण समन्वय समितिका सदस्य-सचिव रतन बुढथापाले बताए । गाउँपालिकाले आफ्नो खर्चमा अलपत्र परेका नागरिकलाई उद्धार गर्न लागेको बताउँदै उनले पातारासी गाउँपालिकाका कोरोना रोकथाम तथा नियन्त्रण समन्वय समितिको बैठकबाट प्रत्येक वडामा निगरानी केन्द्र निर्माण गरिएको बताए । -रासस