प्रधानमन्त्री उपचाररत रहँदा सुस्तायो मिडिया

प्रधानमन्त्री उपचाररत रहँदा सुस्तायो मिडिया

 

नेपालका प्रधानमन्त्री केपी शर्मा ओलीका हरेक काम कारबाही र अभिव्यक्तिप्रति आलोचना र व्यंग्य गर्दैआएका नेपालका दैनिक पत्रिका प्रधानमन्त्री अस्पतालमा रहँदा भने उनीप्रति भद्र देखिएका छन् । प्रधानमन्त्री ओलीको कामको समाचार, टिप्पणी, आलोचना र समालोचना गरेर समाजलाई तरंगित बनाउने नेपालका दैनिक पत्रिका गएको साता खासै सशक्त देखिएनन् । प्रधानमन्त्रीको स्वास्थ्यको विषयमा समाचार त बने तर त्यस्तो कुनै तरंग ल्याउने समाचार बनेन । कोरोनाभाइरस अर्थात् कोभिड–१९ को विषयमा पनि केही समाचार बने तर नेपालमा अहिलेसम्म रोगी फेला नपरेको कारणले पनि यो विषयले दैनिक पत्रिकामा ठूलो महत्त्व पाउन सकेको देखिएन । कोरोनाका कारणले यस वर्षको फागु पूर्णिमा वा होलीमा पनि विशेष हर्षोल्लास र उत्साह देखिएन । 

प्रधानमन्त्रीको मिर्गौला प्रत्यारोपणपश्चात उनको स्वास्थ्यमा क्रमशः सुधार भयो । तर, मंगलवारको दिन प्रधानमन्त्री ओलीलाई अस्पतालबाट तुरुन्तै डिस्चार्ज नगरिने समाचार आयो । यस समाचारलाई बुधबारको गोरखापत्रले पनि ६ कोलममा प्रकाशित गरेर परिवारको आग्रहमा केही दिन उनलाई अस्पतालमै राखिने जानकारी दियो । राजधानीले “सामान्य अवस्थामा फर्किन प्रधानमन्त्रीलाई ६ महिना लाग्ने” शीर्षकमा समाचार बनायो । राजधानीले डिस्चार्जपछि पनि प्रधानमन्त्रीले बालुवाटारबाटै काम गर्ने खबर पनि दियो । नागरिकले पनि सोहीअनुरुपको समाचार बनायो ।

नयाँ पत्रिकाले प्रधानमन्त्रीकी निजी चिकित्सक प्रा.डा. दिव्या सिंह शाहले पत्रकार सम्मेलनमा बोलेको समाचारका आधारमा प्रमलाई सामान्य अवस्थामा आउन ६ महिनादेखि एक वर्षसम्म लाग्ने समाचार दियो । कान्तिपुरले प्रधानमन्त्रीका लागि बालुवाटारमा नयाँ सेटअप बन्दै गरेको समाचार प्रकाशित गर्‍यो । अन्नपूर्ण पोस्टले प्रधानमन्त्रीले डिस्चार्ज हुन चाहेका तर चिकित्सक र परिवारले उनलाई धैर्य गर्न आग्रह गरेको समाचार प्रकाशित गर्‍यो । 

मंगलवारसम्म प्रधानमन्त्रीलाई कहिले डिस्चार्ज गर्ने भन्ने विषयमा निश्चित नभएको टिचिङ अस्पतालले शुक्रवार प्रधानमन्त्रीलाई डिस्चार्ज गरेर बालुवाटार पठायो । शनिवारका दैनिक पत्रिका सबैले यो समाचारलाई महत्त्वका साथ संप्रेषण गरे । आइतवार सार्क राष्ट्रका नेताबीच कोरोना संक्रमणका लागि एकताबद्ध प्रयासका लागि गरिने भिडियो कन्फरेन्समा प्रधानमन्त्री ओलीले भाग लिने समाचारलाई अन्नपूर्ण पोस्टले मुख्य समाचार बनायो । समाचारअनुसार भारतका प्रधानमन्त्री नरेन्द्र मोदीले गरेको कोरोनाविरुद्धको एकताबद्ध प्रयासको सुरुआतका रुपमा आइतवार पाँच बजे सबै नेताहरूको सामूहिक भिडियो वार्ता हुनेछ । सो वार्तामा भाग लिन हालै किडनी प्रत्यारोपण गराएका प्रधानमन्त्री ओली सिंहदरबारस्थित कार्यालय जानेछन् । प्रधानमन्त्रीको स्वास्थ्यले सहयोग नगरेको खण्डमा प्रधानमन्त्रीका परराष्ट्र सल्लाहकार र विज्ञ टोलीले नेपालको तर्फबाट भाग लिने पनि सो समाचारमा जनाइएको छ । 

कोरोनाको त्रास 

प्रधानमन्त्री ओलीको अनुपस्थितिमा सुस्ताएका नेपाली दैनिक पत्रिकाले कोरोनाभाइरसले विश्वभर फैलाएको त्रासको विषयमा समाचार प्रकाशित गरे । तर, गएको साताभर नेपालमा एउटै पनि कोरोना संक्रमणको समाचार नआएको कारणले कोरोनाका विषयमा समाचारले धेरै महत्त्व पाएन । 

गएको साता इटलीले १ करोड ६० लाख नागरिकलाई क्वारेन्टाइनमा बस्न निर्देशन दिएको समाचारले एउटा तरंग ल्यायो । सो देशका प्रधानमन्त्री ज्युसेप्पे कोन्तेले भेनिस र मिलानलगायतका क्षेत्रमा कम्तीमा एक महिना आवागमनमा कडाइ गर्ने र सम्पूर्ण सार्वजनिक स्थान बन्द गर्ने निर्देशन दिएका छन् । यो समाचार अन्नपूर्ण पोस्टको सोमवारको मुख्य समाचार भयो । सोही दिन नेपाल सरकारका तर्फबाट स्वास्थ्य तथा जनसंख्यामन्त्री भानुभक्त ढकालले कोरोना भित्रिन नदिन सरकार विशेष सचेत भएको समाचार गोरखापत्रले प्रकाशित ग¥यो । राजधानी दैनिकले बजारमा फेसमास्क र सेनिटाइजरको अभाव भएको समाचारलाई मुख्य समाचार बनायो । अन्नपूर्ण पोस्टले भने नेपाल प्रवेश गर्ने विदेशीले आफू कोरोनामुक्त भएको प्रमाणपत्र ल्याउनुपर्ने व्यवस्था गरिएको विषयमा समाचार बनायो । 

मंगलवारको कान्तिपुरमा कतारले कामदार प्रवेशमा रोक लगाएको समाचार छ । साथै, धनगढी उपमहानगरले बेसार, बोझो र लसुनको सेवनले कोरोनामा भाइरसबाट बच्न सकिने व्यहोराको अपिल सार्वजनिक गरेको समाचारलाई एन्कर बनायो । कान्तिपुरका जनकराज सापकोटाका अनुसार अधिकांश स्थानीय तह र जिल्ला प्रशासनले निकालेका यस्ता सूचनामा उल्लिखित तथ्य अपुष्ट र भ्रामक देखिएको छ । राजधानीमा निराजन पौडेलले कोरोनाको विषयमा जोखिमभन्दा त्रास बढी भएको भन्दै समाचार लेखे । 

बुधवारको अन्नपूर्ण पोस्टमा राजेश बर्माले बजारमा खाना पकाउने ग्यास र मुख छोप्ने मास्कको अभाव भएको समाचार संप्रेषित गरे । बुधबार कोरोना भाइरस संक्रमणको विषयमा सर्वदलीय बैठक भयो । यस विषयमा गोरखापत्र तथा राजधानीले बिहीबार समाचार प्रकाशित गरे । शुक्रवारको अन्नपूर्णले जमघट नगर्न सुझावसहित नेपाल सरकारको तयारीको विषयमा समाचार लेख्यो । गोरखापत्रले पनि यस्तो समाचार प्रकाशित ग¥यो । राजधानीले आठ देशमा नागरिकलाई नेपालमा आउन अनअराइभल भिसामा कडाइ गरेको समाचार दियो । ती देशमा चीन, इरान, दक्षिण कोरिया, जापान, इटली, स्पेन, फ्रान्स र जर्मनी रहेका छन् । कान्तिपुरले पनि अनअराइभल भिसासम्बन्धी समाचारलाई आठ कोलमको ब्यानर समाचार बनायो । नयाँ पत्रिकाले नेपालमा भएको कोरोना परीक्षण कति विश्वसनीय छ भन्ने प्रश्न उठाउँदै आठ कोलमको समाचार बनायो । 

आइतवारको नयाँ पत्रिकाले चीन र कोरियासहित कोरोना प्रभावित देशबाट नेपालमा निर्बाध उडान भइरहेको समाचारलाई आठ कोलमको ब्यानर समाचार बनाएको छ । साथै उक्त दैनिकले कोरोना भित्रिएको अवस्थामा नेपाल सरकार पहिलो महिनामा १५ सय संक्रमितलाई उपचार गर्नसक्ने तयारीका साथ अघि बढेको समाचार पनि दिएको छ । कान्तिपुरको आइतवारको समाचारअनुसार भारतसँगको आवतजावतका लागि नेपालले वीरगन्ज (रक्सौल), भैरहवा (सुनौली), महेन्द्रनगर (बनवासा) तथा काँकडभिट्टा (रानीगन्ज) का नाकामात्र खोल्ने निर्णय गरेको छ । सामान ढुवानीका लागि भने विगतमा चालु रहेका सबै नाका उथावत् खुल्ला रहनेछन् । 
तस्बिर : रासस

    


 

प्रतिकृया दिनुहोस
ad