बेरुत । विधायकहरूले ११औँ पटकको प्रयासमा पनि राष्ट्रपति छनोट गर्न नसकेपछि विरोध जनाउने उद्देश्यले दुईजना सांसदले लेबनानको संसद्भित्रै रात बिताएका छन् । पछिल्लोपटकको मतदानपछि नाजात सालिवा र मेल्हेम खालाफले च्याम्बर छाड्न अस्वीकार गर्दै भवनभित्रै रात बिताएका हुन् ।

सत्ताबाट बाहिररिन लागेका राष्ट्रपतिको कार्यकाल गत ३१ अक्टोबरमै सकिएको थियो । उनले सत्ता छाड्नुअघि नयाँ राष्ट्रपति निर्वाचित हुनुपर्छ । तर, लेबनानका विभिन्न साम्प्रदायिक दलहरू उत्तराधिकारीका लागि अझै सहमत भएका छैनन् । 

नाजात सालिवाले बीबीसीलाई भनेका छन्, "हामीलाई कसैले पनि हटाउने प्रयास गरेनन् । त्यसको विपरीत संसद्का कर्मचारीहरू निकै सहयोगी देखिए । उनीहरूले हाम्रा लागि बैठक कोठाहरूलगायत महासभाकक्ष पनि खोलिदिए । नियम अनुसार सधैँ दिउँसो साढे २ बजेदेखि विद्युत आपूर्ति बन्द गरिने भएकाले हामीले अँध्यारोमै रात गुजार्‍यौँ । तर हामीले हामीलाई भेट्न आउने अन्य विधायकहरूसहित थुप्रै मानिसबाट धेरै खाना प्राप्त गर्‍यौँ ।" 

फोर्सेज अफ चेन्ज ब्लकका दुवै विधायक सालिवा र खालाफले गत चुनावबाट संसद्मा प्रवेश गरेका थिए । उनीहरूले नयाँ राष्ट्रपति तय नहुन्जेलसम्म आफूहरू संसद्मै बसिरहने बताएका छन् ।  
बीबीसीबाट ।