काठमाडौं । रुपन्देहीका काठ मिल व्यवसायी वसन्त पौडेलको हत्या गर्न सुटरले ३ लाख ५० हजार रुपैयाँ सुपारी लिएको प्रहरी अनुसन्धानबाट खुलेको छ । यसअघि पक्राउ परेका दुईजनालाई आइतबार सार्वजनिक गर्दै प्रहरीले हत्याका निम्ती ३ लाख ५० हजारमा डिल भएको बताएको हो ।
प्रहरीले आइतबार नवलपरासीका पदम चौधरी र सुनसरीका महिनारायण चौधरीलाई सार्वजनिक गरेको छ । प्रहरीले पदमलाई पोखरा र महिनारायणलाई चितवनबाट पक्राउ गरेको जिल्ला प्रहरी कार्यालय रुपन्देहीले जनाएको छ । गएको पुस ५ गते मिलमा काम गर्दै गरेका वसन्तलाई मोटरसाइकलमा आएका दुई जनाले गोली हानी फरार भएका थिए ।
पक्राउ परेका महिनारायण चौधरीले मोटरसाइकल चलाएको र महिनारायण पनि सँगै रहेको प्रहरी अनुसन्धानबाट खुलेको छ । पक्राउ परेका चौधरी यसअघि विभिन्न आपराधिक गतिविधिमा सामेल भएको प्रहरी अनुसन्धानबाट देखिएको छ ।
उनी ७ महिना अगाडिमात्र कारागारबाट निस्किएका थिए । दुवै जना पाल्पा कारागारमा सँगै कैद भुक्तान गरेका हुन् । प्रहरीको अनुसन्धानमा पदम पनि केही समय अगाडि कैद भुक्तान गरेर निस्किएका व्यक्ति हुन् । पदमले घटनामा प्रयोग भएको बाइक र हतियार व्यवस्थापन गरेको अनुसन्धानबाट खुलेको प्रहरीले जनाएको छ । उनीहरुका साथबाट प्रहरीले तीन थान पेस्तोलसमेत बरामद गरेको जनाएको छ ।
पक्राउ परेका पदम र महिनारायणणले हत्या गरेबापत ३ लाख ५० हजार रकम पाउने गरी काम गरेको बयान दिएका छन् । गुन्डा नाइके मनोज पुनको निर्देशनमा काम गरेको र सो गरेबापत ३ लाख ५० हजार रकम पाउने सहमति भएको उनीहरुले प्रहरीमा बयान दिएका छन् । उनीहरु दुवैजना पुनकै समूहका सदस्य रहेको समेत खुलेको प्रहरीले जनाएको छ ।
