काठमाडौं । राजधानी उपत्यकामा चोरी नभएको दिन विरलै हुन्छ । चोरीको उजुरी गर्न प्रहरीकहाँ दैनिक नै मानिसहरुको भीड लाग्छ । महानगरीय अपराध महाशाखाको तथ्यांकअनुसार गएको साउनयता उपत्यकामा ७६ वटा ठूला चोरीका घटना भएका छन् । सानातिना चोरीका घटनाको त प्रहरीले लेखाजोखा नै राखेको छैन । कतिपय सामान्य चोरीका त उजुरी आउँदैनन् पनि । 

चोरीको घटना र प्रकृति हेर्दा सरकारी कार्यालय खुल्ने समय अर्थात् बिहान १० बजेदेखि बेलुका ५ बजेसम्म सबैभन्दा धेरै चोरी हुने गरेको देखिएको छ । त्यसैगरी बिहान ४ देखि १० बजेसम्म पनि निकै चोरी हुने गरेको छ । बेलुका ५ बजेपछि सबैभन्दा कम चोरीका घटना हुने महाशाखा प्रमुख एसएसपी दिवेश लोहनी बताउँछन् । 

प्रहरीका अनुसार काठमाडौं उपत्यकामा सक्रिय रुपमा रहेका चोरको संख्या ३ सयको हाराहारीमा छ । सिन्धुपाल्चोक, रामेछाप, दोलखा, नुवाकोट, मकवानपुर, सिन्धुलीलगायत जिल्लाबाट आएर राजधानीमा चोरी कर्ममा लाग्नेहरु धेरै पाइएको प्रहरी अधिकारी बताउँछन् । सर्लाही, पर्सा, बारा र भारतको बिहारका समूहसमेत काठमाडौंमा आएर संगठित रुपमा चोरीमा लागेको एसएसपी लोहनीले बताए । 

लोहनी भन्छन्, “प्रहरीलाई हैरान खेलाउने भनेको टापटिपेभन्दा संगठित रूपमा चोरी–डकैतीलाई पेसा बनाउने नै हुन् । लतिलपुर तथा भक्तपुरमा यस्तो संगठित समूहको संख्या ७ छ । अधिकांश समूहमा स्वदेशी चोर नै छन्, २ वटा समूह भारतीय नागरिकको हो ।”

अनुसन्धान अधिकारीका अनुसार उपत्यकामा सक्रिय चोरहरुको पनि आ–आफ्नै क्षेत्र छ । अर्काको क्षेत्रमा गएर चोरी गरेमा चोरहरुकै समूहमा भिडन्त पर्ने गरेको छ । नेपाली चोर समूह प्रायः अरुको क्षेत्रमा जाँदैनन्, तर भारतीय र तराईका चोरहरु मिलेर बनेको समूह जहाँ पायो त्यही चोरी गर्न पछि पर्दैन । 

प्रहरीका अनुसार उपत्यकामा कर्ण समूह, जिमी समूह, बासु समूह, रामेछापे समूह, दोलखाली समूह, विष्णु समूह र भारतीय समूह संगठित चोरीमा सक्रिय छन् ।  यी समूहबीच एक अर्कामा कनेक्सन छैन । यिनीहरु एकपटक पक्राउ परेर छुटेपछि  लगत्तै चोरीमा नै संलग्न हुन्छन् । 

महाशाखाका अनुसार उपत्यकामा सक्रिय ३ सय व्यावसायिक चोरमध्ये १ सय ५० को हाराहारीमा हिरासतमा छन् भने बा“की चोरीमै सक्रिय छन् । यी समूहले दैनिक उपत्यकामा मात्र महिनाको २० वटासम्म ठूलो चोरी गर्छन् । विशेषगरी गहना तथा इलेक्ट्रोनिक सामानमा चोरको आ“खा पुग्ने गरेको प्रहरी अनुसन्धानबाट खुलेको छ । 

प्रहरीमा परेका उजुरीलाई हेर्ने हो भने काठमाडौंका महाराजगञ्ज, थापागाउ“, शान्तिनगर, रातोपुल, बाफल, गैरीगाउ“, डल्लु, कलंकी, सिनामंगल, गौरीघाट बढी चोरी हुने क्षेत्र हुन् । चोरी नै नहुने भने राजधानीको कुनै स्थान छैन । 

एक्लै चोर्न जाने ग्याङ बनाएर फर्किन्छ
चोरी गरी जेल परेका सामान्य चोर पनि समूह बनाएर बाहिर निस्कने गरेको प्रहरी अनुसन्धानबाट खुलेको छ । “कुनै एउटा चोरीको घटनामा जेल गएको चोर सुध्रिएर फर्कियो होला भन्ने सोचाइ हुन्छ, तर त्यो व्यक्तिले जेलभित्रै समूह खडा गरेको हुँदो रहेछ । जेलबाट बाहिर निस्केपछि कता चोरी गर्ने भन्ने पनि फिक्स हुने गरेको उनीहरु पुनः पक्राउ पर्दा खुल्छ,” एसएसपी लोहनी भन्छन्, “त्यस्ता चोरहरु पक्राउ पर्दा पनि ढुक्क हुन्छन्, धरौटीमा छुटिहालिन्छ भनेर ।”