काठमाडौं । इजरायल र हमास नयाँ युद्धविराम सम्झौताको नजिक छन् । जसले २१ महिनाको युद्धलाई रोक्न, इजरायली बन्धकहरूलाई मुक्त गर्न, ठूलो परिमाणमा मानवीय सहायता प्रदान गर्न र द्वन्द्वको अन्त्यका लागि व्यापक वार्ता सुरू गर्न लक्ष्य राखेको छ । 

इजरायली प्रधानमन्त्री बेन्जामिन नेतन्याहूले सोमबार वासिङ्टनमा अमेरिकी राष्ट्रपति डोनाल्ड ट्रम्पसँग भेट गरे, जसले यो प्रस्तावलाई समर्थन गरेका छन् ।

हमासको युद्ध अन्त्य र इजरायली सेनाको पूर्ण फिर्ताको माग, इजरायलको हमासले आत्मसमर्पण तथा निशस्त्रीकरण गर्नुपर्ने अडानका कारण वार्ताहरू बारम्बार अवरुद्ध भएका छन् ।

एसोसिएटेड प्रेसले प्राप्त गरेको मस्यौदाअनुसार, युद्धविराम ६० दिनसम्म लागु हुनेछ । यसमा १० जीवित बन्धक रिहा र १८ जनाको शव चरणबद्ध रूपमा फिर्ता गरिनेछ । बदलामा, इजरायलले केही प्यालेस्टिनी कैदीहरू रिहा गर्नेछ । यद्यपि, संख्या उल्लेख गरिएको छैन ।

संयुक्त राष्ट्रसंघद्वारा वितरण गरिने मानवीय सहायता उल्लेखनीय रूपमा बढाइनेछ, तर अमेरिका र इजरायल समर्थित गाजा मानवीय फाउन्डेसनको उल्लेख गरिएको छैन ।

इजरायली सेनाहरू गाजाको इजरायल र इजिप्टसँगको सीमामा बफर जोनमा फिर्ता हुनेछन्, जहाँ इजरायलले गत मार्चमा अघिल्लो युद्धविराम समाप्त भएदेखि ठूलो क्षेत्र नियन्त्रणमा लिएको छ । 

युद्धविरामको पहिलो दिनदेखि दुवै पक्षले स्थायी समाधानका लागि वार्ता सुरू गर्नेछन्, तर समयसीमा उल्लेख गरिएको छैन । मध्यस्थकर्ताहरू–अमेरिका, इजिप्ट र कतारले इमानदारीपूर्वक वार्ता सुनिश्चित गर्नेछन् । 

युद्धको अन्त्यको ग्यारेन्टी नभए पनि, प्रस्तावमा ट्रम्पले युद्धविरामको समयमा हुने वार्ताले ‘स्थायी समाधान’तर्फ लैजाने दाबी गरेको उल्लेख छ । 

यदि ६० दिनपछि वार्ता सम्पन्न नभए युद्धविराम लम्ब्याउन सकिनेछ । सम्झौता अन्तिम भएपछि ट्रम्पले व्यक्तिगत रूपमा युद्धविरामको घोषणा गर्नेछन् ।