काठमाडौं । स्पेनिस क्लब बार्सिलोनाविरुद्ध १–० को जित निकाल्दै इंग्लिस क्लब आर्सनलले महिला च्याम्पियन्स लिगको उपाधि जितेको छ ।

शनिबार राति लिस्बनस्थित स्टाडियो जस अल्भालाडेमा सम्पन्न खेलमा आर्सनललाई जित दिलाउन स्टिना ब्ल्याकस्टेनिसले गरेको एक मात्र गोल निर्णायक बन्यो ।

पहिलो हाफ गोलरहित बराबरीमा समाप्त भए पनि ७४औँ मिनेटमा ब्ल्याकस्टेसिनले गोल गर्दै आर्सनललाई अग्रता दिलाएकी थिइन् । यही गोल आर्सनललाई युरोपमा महिला फुटबलको च्याम्पियन बनाउन पर्याप्त बन्यो ।

महिला च्याम्पियन्स लिगको इतिहासमा आर्सनल १७ वर्षपछि च्याम्पियन बनेको हो । आर्सनलले यसअघि सन् २००७ मा महिला च्याम्पियन्स लिगको उपाधि जितेको थियो । यता, सन् २०२१ पछि लगातार फाइनलमा स्थान बनाउँदै आएको बार्सिलोना भने समग्रमा तेस्रो पटक उपविजेता बनेको हो । बार्सिलोना यसअघि सन् २०१९ र २०२२ मा फाइनल पुगे पनि उपविजेता बनेको थियो ।