काठमाडौं । भारत–पाकिस्तान तनावको बीचमा राजस्थानका सीमावर्ती जिल्लाहरू उच्च सतर्कतामा छन् । बिहीबार राति अबेरसम्म जारी गोलाबारीपछि प्रशासनले शुक्रबार बाडमेर र जैसलमेर जिल्लामा नयाँ निर्देशिका जारी गरेको छ ।

प्रशासनको अपिलमा बाडमेर र जैसलमेरका व्यापारीहरूले साँझ ५ बजेदेखि सबै बजार र प्रतिष्ठानहरू बन्द गरेका छन् ।

दुवै जिल्लामा साँझ ६ देखि शनिबार बिहान ६ बजेसम्म १२ घण्टा ब्ल्याकआउट हुनेछ । यस समयमा मानिसहरूलाई घरमै बस्न पनि अपिल गरिएको छ ।

बाडमेरमा रातभरि सवारीसाधन चलाउन प्रतिबन्ध लगाइनेछ । जबकि, रक्षा क्षेत्रको पाँच किलोमिटर दायराभित्र प्रवेश पूर्ण रूपमा बन्द गरिएको छ ।

जैसलमेरमा सबै प्रकारका सामाजिक कार्यक्रमहरूमा प्रतिबन्ध लगाइएको छ । मेला, जुलुस, धार्मिक जुलुस, र्‍याली र प्रदर्शनीलगायत सबै प्रकारका कार्यक्रम आयोजना गर्न प्रतिबन्ध लगाइने जनाइएको छ ।

उत्तर पश्चिमी रेलवेका प्रमुख जनसम्पर्क अधिकारी शशी किरणले दिएको जानकारीअनुसार बाडमेर र जैसलमेर जाने धेरै रेलहरू पनि रद्द गरिएका छन् । जिल्ला प्रशासनले जोधपुरमा ब्ल्याकआउटको बारेमा आदेश जारी गरेको छ, यहाँ मध्यरात १२ बजेदेखि शनिबार बिहान ४ बजेसम्म ब्ल्याकआउट हुनेछ ।

राजस्थानका मुख्यमन्त्री भजनलाल शर्माले शुक्रबार साँझ मुख्यमन्त्री कार्यालयमा मन्त्रिपरिषद्को बैठक बोलाए । बैठकपछि उनले एक विज्ञप्ति जारी गर्दै राज्यको प्रशासनिक प्रणाली र विपद् राहतसम्बन्धी तयारीको विस्तृत समीक्षा गरिएको बताए ।

मुख्यमन्त्रीले सीमावर्ती जिल्लाहरूमा थप एम्बुलेन्स, दमकल र रक्त बैंक सेवाहरू उपलब्ध गराउने व्यवस्था पनि गरिएको बताए । बीबीसी