काठमाडौं । कुलमान घिसिङलाई नेपाल विद्युत् प्राधिकरणको कार्यकारी निर्देशकबाट हटाएको विरोधमा काठमाडौंमा प्रदर्शन गरिएको छ । विभिन्न संघसंस्थाले कुलमान घिसिङ पुनर्बहाली संघर्ष आन्दोलन समिति बनाएर उनको पक्षमा आइतबार काठमाडौंको माइतीघरमा प्रदर्शन गरेका हुन् ।

उनीहरूले 'उज्यालो नेपालका नायक' घिसिङलाई बिचौलियाको सेटिङमार्फत हटाएको आरोप लगाएका छन् । प्रदर्शनकारीले प्रधानमन्त्री र ऊर्जामन्त्रीको राजीनामा पनि माग गरेका छन् ।

सांस्कृतिक भेषभूषा तथा बाजागाजासहित प्रदर्शनकारीले घिसिङको पक्षमा नाराबाजी गरेका थिए । प्रदर्शनकारीले 'देशको सान, कुलमान घिसिङ' लेखिएको प्लेकार्ड बोकेका थिए ।

उनीहरूले 'घाटामा गएको संस्थालाई फाइदामा पुर्‍याएर कुलमानले के अपराध गरे ?' भन्दै सरकारलाई प्रश्न गरेका थिए । सिंहदरबार र बालुवाटारमा बसेर 'भ्रष्ट बिचौलियालाई सुनेर कुलमानलाई हटाइएको' उनीहरूको आरोप छ ।

हेर्नुहोस् तस्बिरहरू

तस्बिरहरू : हरिशजंग क्षेत्री/बाह्रखरी