
काठमाडौं । नगेन्द्रराज शर्मा साहित्यिक पत्रकारिता कोषले २०८१ सालको ‘नगेन्द्रराज शर्मा साहित्यिक पत्रकारिता पुरस्कार’ ‘नवप्रज्ञापन’ त्रैमासिक साहित्यिक पत्रिकाका सम्पादक नवराज रिजाललाई प्रदान गरेको छ ।
अग्रज साहित्यिक पत्रकार नगेन्द्रराज शर्माको ८८औँ जन्मोत्सवको अवसर पारेर शुक्रबार काठमाडौंमा आयोजित कार्यक्रममा अग्रज साहित्यिक पत्रकारहरू शर्मा र रोचक घिमिरेले नगद राशि २५ हजार रुपैयाँ सहित उक्त पुरस्कार प्रदान गरे ।
उक्त अवसरमा अभिव्यक्ति पत्रिकाका संरक्षक शर्माले ५० वर्षअघि अभिव्यक्तिको प्रकाशन गर्दाका प्रसंग स्मरण गर्दै साहित्यिक पत्रिका पैसाले मात्र नभई तपस्याले प्रकाशित हुँदै आएको उल्लेख गरे । उनले अभिव्यक्तिको प्रकाशनमा सहयोग गर्ने सबैप्रति आभार व्यक्त गरे ।
साहित्यिक पत्रिका रचनाका प्रधान सम्पादक रोचक घिमिरेले साहित्यिक पत्रकार र सरकारको सम्बन्धको चर्चा गर्दै सरकारले यस्ता रचनात्मक काममा कहिल्यै ध्यान नदिएको र सहयोग समेत नगरेको बताए ।
पुरस्कार कोषका सदस्य कवि विधान आचार्यले पुरस्कृत पत्रिकाको चर्चा गर्दै रिजालको कामको प्रशंसा गरे । पुरस्कृत पत्रिकाका सम्पादक रिजालले बारा जिल्लामा पत्रिका दर्ता गरेर विगत ३० वर्षदेखि प्रकाशन गर्दाका आरोह अवरोहबारे उल्लेख गरे । उनले आफूलाई यस पुरस्कारले थप दायित्वबोध गराएको बताए ।
नवप्रज्ञापनको १०७औँ अंक केही समयअघि प्रकाशित भएको छ । कोषका अध्यक्ष पवन आलोकले यो पुरस्कार जनस्तरबाट स्थापना भएको बताए । कार्यक्रममा देविका तिमिल्सिना, किशोर पहाडी, शंकर भारतीले बोलेका थिए ।
कोषले यसअघि साहित्यिक पत्रकारहरू रोचक घिमिरे, रामप्रसाद पन्त र चूडामणि रेग्मीलाई पुरस्कृत गरिसकेको छ ।