काठमाडौं । प्रधानमन्त्री केपी शर्मा ओलीले पूर्वराजा ज्ञानेन्द्र शाहले संविधानसभाको ऐतिहासिक निर्णयपछि भएको सम्झौताको उल्लंघन गरेको आरोप लगाएका छन् । 

“प्रारम्भिक अध्ययनमा यी सबै घटनाले स्पष्ट पार्छ, पूर्वराजा ज्ञानेन्द्र शाहले संविधानसभाको ऐतिहासिक निर्णयपछि भएको सम्झौताको उल्लंघन गर्नुभएको छ,” सोमबार प्रतिनिधिसभाको बैठकलाई सम्बोधन गर्दै ओलीले भने ।

तत्कालीन अवस्थामा पूर्वराजा शाहसँग नागरिकको हैसियतमा शान्त जीवन बिताउने, नागरिकको कानुनी र संवैधानिक अधिकार प्रयोग गरेर व्यापार व्यावसाय सञ्चालन गर्ने, पूर्वराष्ट्रप्रमुखको हैसियतमा सरकारले सुरक्षाको प्रबन्ध गर्ने सम्झौता भएको उनको भनाइ छ । उनलाई नागार्जुन दरबार प्रयोग गर्न र उनको मातालाई नारायणहिटी दरबार परिसरको भवन प्रयोग गर्न दिने सहमति भएको प्रधानमन्त्री ओलीले बताए ।

ओलीले अहिलेका राष्ट्रियसभा सदस्य एवम् तत्कालीन गृहमन्त्री कृष्णप्रसाद सिटौलाले सरकारको तर्फबाट संवाद/व्यवस्थापन गरेको स्मरण उनले गरे ।