काठमाडौं । भक्तपुरको मध्यपुर थिमि नगरपालिका–९, बोडे नीलबाराहीस्थित पिकनिकस्थलनजिक पार्किङ क्षेत्रमा मृत फेला परेका ओमप्रकाश राईको हत्या गरिएको खुलासा भएको छ । १०० रुपैयाँमा विवाद हुँदा ढुंगाले हानेर उनको हत्या गरिएको प्रहरी अनुसन्धानका क्रममा पत्ता लागेको हो ।

हत्या आरोपित ५७ वर्षीय हिमाल बुढामगरलाई पक्राउ गरिएको जिल्ला प्रहरी परिसर भक्तपुरका डीएसपी एवं प्रवक्ता ढुण्डीराज न्यौपानेले जानकारी दिए । आरोपित बुढामगर रोल्पाको परिवर्तन गाउँपालिका–६ का बासिन्दा हुन् ।

डीएसपी न्यौपानेका अनुसार, १०० रुपैयाँको विवादमा राईको हत्या गरेको बुढामगरले बयान दिएका छन् । बुढामगरले प्रहरीसमक्ष बयानका क्रममा आफैँले हत्या गरेको स्वीकारेका छन् । हत्या गरिएका राई खोटाङको केपिलासगढी गाउँपालिका–२ का बासिन्दा हुन् ।

बुढामगरले प्रहरीसमक्ष आइतबार (चैत १०) साँझ आफूहरू (राई र बुढामगर) दुवैजना मिलेर ५/६ गिलास रक्सी सेवन गरेको बताएका डीएसपी न्यौपानेले जानकारी दिए ।

त्यसपछि उनीहरू भेटी टिप्न भन्दै नीलबाराही पिकनिकस्थल पुगे । भेटी टिपेर सुत्न जाने क्रममा १०० रुपैयाँमा विवाद हुँदा हत्या गरेको बुढामगरको भनाइ उद्धृत गर्दै प्रहरीले जनाएको छ ।

प्रहरीसमक्ष बयानका क्रममा बुढामगरले भनेका छन्, “दुवैजना सुत्न जाने बेला १० गते राति १२ः०५ बजे ओमप्रकाशले मेरो १०० रुपैयाँ खोसेर लिएपछि मैले फिर्ता माग्दा दिएन । त्यसपछि ओमप्रकाशको हात बेस्सरी च्यापेँ । त्यसपछि पैसा नदिएपछि भुइँमा लडाई लडाई सोही ठाउँमा भएको ढुंगा उठाएर पटक–पटक प्रहार गरेर मारेको हुँ ।”

हत्या आरोपित बुढामगरलाई सार्वजनिक गर्ने प्रहरी तयारी छ । “हत्या आरोपीलाई आजै (चैत १२) सार्वजनिक गर्ने तयारी छ,” डीएसपी न्यौपानेले बाह्रखरीसित भने, “दुवैजना कवाडीका सामान संकलन गर्ने काम गर्ने रहेछन् । सँगै हिँड्ने साथी रहेछन् । दुवैजना मन्दिरको भेटी संकलन गर्ने क्रममा नीलबाराही पुगेको पाइयो ।”

गएको आइतबार (चैत १०) बिहान करिब ५ः५५ नीलबाराहीस्थित पिकनिकस्थलनजिक पार्किङ क्षेत्रमा राई मृत फेला परेका थिए । प्रहरीले घटनास्थलबाट रगत लत्पतिएको ढुंगा बरामद गरेको थियो । राईको दाहिने कानको लोती चुँडिएको, टाउकोमा गहिरो चोेट देखिएको थियो ।

राईको चारजनाको परिवार रहेको प्रहरी अनुसन्धानबाट खुलेको छ । उनका तीन छोरा छन् । राईका छोरा सम्पर्कमा आएर शव सनाखत पनि भइसकेको प्रहरीले जनाएको छ ।