काठमाडौं । लगातार ९ दिनसम्म बढेर २८९० विन्दुमा पुगेको सेयर बजार मापक नेप्से परिसूचक घटेर २६१४ विन्दुमा झरेको छ । पछिल्ला १४ कारोबार दिनमा बजार एक दिन १७ अंकले बढेर अरू १३ दिन घटेको छ । १४ दिनको कारोबारमा नेप्से परिसूचक २७५.५५ अंकले घटेको छ ।

नेपाल स्टक एक्सचेन्ज (नेप्से)का अनुसार परिसूचकसँगै कारोबार रकममा पनि कमी आएको छ । बजार बढ्दै जाँदा १४ अर्बभन्दा बढीको सेयर खरिद–बिक्री भएको थियो । गत फागुन १८ गते बजार ७५.२४ अंकले बढेर २८९० विन्दुमा पुग्दा १४ अर्ब २८ करोड रुपैयाँको सेयर खरिद–बिक्री भएको थियो ।

तर, पछिल्ला दिनहरूमा बजार घट्दै जाँदा दैनिक कारोबार रकम पनि घट्दै गएको छ । गत बिहीबार त साढे चार अर्बको मात्र सेयर खरिद–बिक्री भयो । गत साताको पाँच कारोबार दिन नै कारोबार रकम सात अर्बभन्दा कम देखियो । सो साताको मंगलबारको कारोबार दिन चार अर्ब ३४ करोड रुपैयाँको सेयर खरिद–बिक्री भएको थियो । बिहीबारको तुलनामा आइतबार (आज) सेयर कारोबार रकम वृद्धि भएको छ । आइतबार ६ अर्ब ३२ करोड रुपैयाँको सेयर खरिद–बिक्री भएको छ ।

गत साताका पाँच कारोबार दिन नै बजार घट्यो । गत साताको पाँच कारोबार दिनमा बजार ६७.१५ अंकले घटेको थियो । तर, यो साताको पहिलो दिन आइतबार नै बजार ५४.६२ अंकले घट्यो ।