पाल्पा । पाँच दिनदेखि बेपत्ता भारतीय युवक कालीगण्डकी नदीमा मृत फेला परेका छन् । पाल्पाको बगनासकाली गाउँपालिका–५, राम्दीस्थित कालीगण्डकी नदीमा नुहाउने क्रममा बेपत्ता भएका भारतको उत्तर प्रदेशको गोरखपुरका २५ वर्षीय शिवम पाण्डेय आइतबार (चैत १०) मृत फेला परेका हुन् । 

गएको बुधबार दिउँसो नुहाउने क्रममा पाण्डेय बेपत्ता भएका थिए । उनको शव राम्दीघाटदेखि झन्डै एक किलोमिटर टाढा बग्दै गरेको अवस्थामा भेटिएको जिल्ला प्रहरी कार्यालयका सूचना अधिकारी एवं डीएसपी सुनील मल्लले जानकारी दिए ।

पोखराबाट घुमेर घर फर्कने क्रममा पाण्डेयसहित चारजना कालीगण्डकीमा नुहाउन गएका थिए । त्यसक्रममा पाण्डेय डुबेर बेपत्ता भएको डीएसपी मल्लले बताए । रासस