काठमाडौं । चलचित्र केन्द्रीय जाँच पास समिति (सेन्सर बोर्ड)ले चलचित्र ‘राजागंज’लाई प्रदर्शन अनुमति दिएको छ । बुधबार सेन्सर बोर्डले प्रदर्शन अनुमति दिएको हो ।

यसअघि, बोर्डले प्रधानमन्त्री केपी शर्मा ओलीले गरेको भाषणको अंश राखेपछि प्रदर्शनको अनुमति दिएको थिएन । तर, निर्माण पक्ष ओलीको अभिव्यक्ति हटाउन तयार भएपछि बोर्डले अनुमति दिएको स्रोतले जनाएको छ ।

चलचित्रमा ‘कुहिएको आँप’ शब्द प्रयोग भएपछि सेन्सरले आपत्ति जनाएको थियो । यो शब्द हटाउन सेन्सरले सुझाएपछि निर्माणपक्षले चलचित्रको मर्म नै मर्ने भन्दै नहटाउने अडान लिएको थियो । तर, सेन्सरले राख्ने भए प्रधानमन्त्रीको कार्यालयबाट अनुमतिसहितको पत्र लिएर आउन भनेको थियो ।

‘राजागंज’ नेपालमा चैत १ गतेबाट प्रदर्शनमा आउँदै छ । दीपक रौनियारको निर्देशन रहेको चलचित्र ‘राजागंज’ले २०७२ सालमा संविधान जारी भएपछि विरोधमा भएको मधेस आन्दोलनलाई केन्द्रमा राखेर कथा भन्नेछ । मधेस आन्दोलन चर्किरहँदा अपहरणमा परेका सभासद र प्रधानध्यापकका छोरालाई मुक्त गराउन प्रहरीले चालेको खोजी अप्रेसनको कथा यो सिनेमाले देखाउनेछ । 

चलचित्रमा आशा मगराती, दयाहाङ राई, विजय बराल, ऋचा शर्मा, पशुपति राई, पूर्वमिस नेपाल निकिता चाण्डक, गौमाया गुरुङ, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठलगायतको अभिनय छ ।

चलचित्रको निर्माणमा आदि फिल्मसका तर्फबाट निर्देशक रौनियार र अभिनेत्री मगराती, बासुरी फिल्मसका तर्फबाट रामबाबु गुरुङ र मनिराम पोखरेल, अभिनेता दयाहाङ राई तथा तन्हाउसर गेटका तर्फबाट एलन आर मिलिगनले सहकार्य गरेका छन् ।

यो सिनेमालाई नेपालमा टिफल्क र ब्यांकटेस इन्टरटेनमेन्टले संयुक्तरूपमा रिलिज गर्ने भएका छन् ।